استانالىق قۇتقارۋشىلار سۋبۇرقاقتاردا شومىلۋدىڭ قانشالىقتى ءقاۋىپتى ەكەنىن ەسكە سالدى. سەبەبى بۇل قۇرىلعىلاردا سۋدى سۇزگىدەن وتكىزۋ جانە تازالاۋ جۇيەلەرى قاراستىرىلماعان، - دەپ حابارلايدى aqshamnews.kz ءتىلشىسى Almaty.tv-عا سىلتەمە جاساپ.
قۇتقارۋشىلاردىڭ ايتۋىنشا، سۋبۇرقاقتاردا مەحانيكالىق جاراقات الۋ ءقاۋپى جوعارى، سەبەبى ولاردىڭ بەتى تەگىس ەمەس، سۋ اعىندارى، دەكوراتيۆ ەلەمەنتتەر، سونداي-اق ولاردىڭ ىشىنە ورناتىلعان قۇبىرلار مەن سورعىلار جاراقات تيگىزۋى مۇمكىن. سونىمەن قاتار، كوپتەگەن سۋبۇرقاق جارىقتاندىرۋ جانە باسقا دا ەلەكتر جابدىقتارىمەن جابدىقتالعان، ال ودان توق سوعۋى مۇمكىن.
سول سەبەپتى بارلىق سۋبۇرقاقتا شومىلۋعا تىيىم سالىنعانىن بىلدىرەتىن ارنايى بەلگىلەر ورناتىلعان. سۋبۇرقاق – قالانى كورىكتەندىرۋ ەلەمەنتتەرى. ولار اۋانى ىلعالداندىرۋعا جانە ەستەتيكالىق ماقساتتارعا ارنالعان.
بۇل قۇرىلعىلاردا سۋدى سۇزگىدەن وتكىزۋ جانە تازالاۋ جۇيەلەرى قاراستىرىلماعان.
"سۋبۇرقاقتار قوعامدىق ورىنداردا ورنالاسقاندىقتان، ولاردىڭ سۋى تەز لاستانادى: ىشىنە قوقىس، جاپىراق، شاڭ-توزاڭ، جاندىكتەر تۇسەدى. وندا جانۋارلار مەن قۇستار دا شومىلۋى مۇمكىن، ال ولار ءتۇرلى ينفەكسيالاردىڭ تاسىمالداۋشىسى. سۋ – ۆيرۋستار مەن باكتەريالار ءۇشىن قولايلى ورتا. ال اۋا تەمپەراتۋراسىنىڭ جوعارى بولۋى ميكرواعزالاردىڭ تەز كوبەيۋىنە ىقپال ەتەدى. سوندىقتان وندا شومىلۋعا عانا ەمەس، ءتىپتى قولدى نەمەسە جەمىس-جيدەكتى جۋۋعا دا بولمايدى"، – دەپ ەسكەرتتى استانا قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحامعالي ارىسپايەۆ.
زەرتحانالىق تالداۋلاردان مۇنداي سۋدا ەنتەرو جانە روتاۆيرۋستار، ىشەك تاياقشالارى، سالمونەللالار مەن شيگەللالار (ديزەنتەريا قوزدىرعىشتارى) سياقتى جەدەل ىشەك ينفەكسيالارىن قوزدىراتىن پاتوگەندى ميكرواعزالار بولۋى مۇمكىن ەكەنى انىقتالعان. اسىرەسە باۋىردى زاقىمدايتىن جانە ونىڭ قىزمەتىنە اۋىر نۇقسان كەلتىرەتىن ا گەپاتيتى ۆيرۋسىنان ساق بولۋ كەرەك.