الماتىدا كەزەكتى تويعا بارعان 40 ادام انىقتالدى
الماتىدا كەزەكتى تويدىڭ توقتاتىلعانى تۋرالى اقپاراتتى مونيتورينگتىك توپ وكىلدەرى جاريالادى. تەكسەرىس جۇرگىزۋشىلەر 11 قىركۇيەك كۇنى كەشكى جەتىدەن كەيىن جەتىسۋ اۋدانىنداعى «دانيار» مەيرامحاناسىندا ءتارتىپ بۇزۋشىلىقتى انىقتادى، دەپ حابارلايدى Almaty-akshamy.kz.
مونيتورينگتىك توپ وكىلدەرى حابارلاعانداي، بانكەتتە 40-قا جۋىق ادام بولعان. اتالعان فاكت بويىنشا سانيتارلىق-ەپيدەميولوگيالىق باقىلاۋ باسقارماسىنا بەرۋ ءۇشىن اكىمشىلىك ماتەريال جينالدى.
ەستەرىڭىزگە سالا كەتەيىك، اۋرۋ دەڭگەيىنىڭ تومەندەۋىنە قاراماستان، الماتىدا ادامدار كوپ جينالۋىمەن وتەتىن بارلىق ءىس-شارالارعا ءالى دە تىيىم سالىنعان. قالا تۇرعىندارى مەن قوناقتارىن بانكەتتەرگە، ۇيلەنۋ تويلارىنا بارماۋعا شاقىرادى، ويتكەنى وندا كوروناۆيرۋستىق ينفەكسيانىڭ سيمپتومسىز تاسىمالداۋشىلارى بولۋى مۇمكىن.
9-12 قىركۇيەك ارالىعىندا الماتىدا زاڭدى تۇلعالار تاراپىنان كارانتيندىك شارالاردىڭ 34 بۇزىلۋى انىقتالدى.
جىل باسىنان بەرى 39 051 نىسان تەكسەرىلىپ، كارانتيندىك شارالار بۇزىلعان 3708 نىسان انىقتالدى. 5847 حاتتاما، ونىڭ ىشىندە زاڭدى تۇلعالارعا 220 165 910 تەڭگە سوماسىنا 628 حاتتاما تولتىرىلدى. جەكە تۇلعالارعا قاتىستى بەتپەردە رەجيمىن بۇزعانى ءۇشىن 229 655 410 تەڭگە سوماسىنا 5219 حاتتاما جاسالدى.
كارانتيندى قاساقانا بۇزۋشىلارعا قاتىستى سوتتارعا 76 ءىس بەرىلدى، ونىڭ ىشىندە 67 ماتەريال بويىنشا قىزمەتتى توقتاتا تۇرۋ تۋرالى شەشىمدەر قابىلداندى.
سونىمەن قاتار، وسى كۇندەرى مونيتورينگتىك توپتار 108 اۆتوبۋس پەن تروللەيبۋستا بەتپەردە رەجيمىنىڭ ساقتالۋىن تەكسەردى. ەپيدەميولوگتاردىڭ ايتۋىنشا، كوروناۆيرۋستى جۇقتىرۋدىڭ ىقتيمال ورىندارىنىڭ اراسىندا قوعامدىق كولىك كورسەتىلگەن، بۇل سەگمەنتتە تەكسەرۋشىلەردىڭ جۇمىسى كۇشەيتىلگەن. ولار جولاۋشىلار مەن كولىك جۇرگىزۋشىلەرىنىڭ بەتپەردەنى دۇرىس كيۋىن قاداعالايدى.
مىسالى، 13-14 قىركۇيەكتە الماتىدا قوعامدىق كولىكتە بەتپەردە رەجيمىن ساقتاماعانى ءۇشىن ق ر اقبتك-نىڭ 425-بابى 1-بولىگى بويىنشا 52 جەكە تۇلعا جانە 1 زاڭدى تۇلعا اكىمشىلىك جاۋاپكەرشىلىككە تارتىلدى. ەكى كۇن ىشىندە 222-دەن استام اۆتوبۋسقا مونيتورينگ جۇرگىزىلدى. قالاداعى كەلەسى مارشرۋتتاردا بۇزۋشىلىقتار انىقتالدى: №34، 36، 72، 73، 102، 135، 217، 120، 25، 65، 66، 5، 19، 66، 141، 29، 202، 78، 23، 47، 118، 16، 67، 11.
جىل باسىنان بەرى قوعامدىق كولىكتە 688 اۆتوبۋسقا مونيتورينگ جۇرگىزىلىپ، جولاۋشىلار اراسىندا 140 ءتارتىپ بۇزۋشى انىقتالدى.