الماتىدا تۇڭعىش رەت جاسوسپىرىمدەر اراسىندا قوبىزدان سايىس ءوتتى
سايىستىڭ گالا كونسەرتى «الاتاۋ» ءداستۇرلى ونەر تەاترىندا ەل تاۋەلسىزدىگىنىڭ 30 جىلدىعى مەن قالا كۇنىنە وراي ۇيىمداستىرىلدى. دودادا ەلىمىزدىڭ تۇكپىر-تۇكپىرىنەن كەلگەن 18 جاسقا دەيىنگى جاسوسپىرىمدەر ب ا ق سىناسقان، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
«ءىس شارانىڭ باستى ماقساتى – ۇلتتىق ونەرىمىزدى ناسيحاتتاۋ جولىندا عاسىرلار قويناۋىنان سىر شەرتەتىن دالا ءۇنىن، ياعني قوبىزدىڭ ءۇنىن، بۇگىنگى تاڭدا جاستارعا تالىمدىك تاعىلىمى مول دۇنيەنى تانىتۋ»، – دەدى قالالىق مادەنيەت باسقارماسى باسشىسىنىڭ ورىنباسارى دانيار الييەۆ.
قورقىتتىڭ ءىزىن جالعاستىرۋشى ونەرپاز ۇرپاقتار سانى جىل سايىن ارتىپ كەلەدى. سايدىڭ تاسىنداي سايىسكەرلەردىڭ باعاسىن بەرەتىن ءادىل قازىلار القاسى ولاردان ۇلكەن ءۇمىت كۇتەتىنىن جەتكىزدى.
«وسى بايقاۋعا قاتىسقانىما وتە قۋانىشتىمىن. سەبەبى تاۋەلسىزدىك العالى بەرى 30 جىلدا كوپتەگەن جاس تالانتتار شىعىپ جاتىر. وسىنداي بايقاۋلار كوپ بولسىن دەيمىن. جالپى، ۇلتتىق ورىنداۋشىلاردىڭ دەڭگەيى ءوسىپ كەلە جاتىر»، – دەدى پريما-قوبىزشى عازيزا عابراحيموۆا.
«14 وبلىس، 2 قالادان قاتىسىپ، بۇگىنگى كۇندە 12 قوبىزشى العا شىعىپ وتىر. ەندى بۇگىن تاعى دا تورتەۋىن، جەكە داراسىن تاڭدايمىز»، – دەدى «جەلتوقسان 1986. تاۋەلسىزدىك قىراندارى» قوعامدىق بىرلەستىگىنىڭ ءتورايىمى گۇلباحرام ءجۇنىس.
بايقاۋ قورىتىندىسى بويىنشا، باس جۇلدەنى 13 جاسار جاناحمەتوۆا بايان ۇتىپ الدى.