الماتىدا بالالار الاڭى مەن اۆتوتۇراق ءۇشىن جاڭا تالاپتار ەنگىزىلدى
الماتىدا كورىكتەندىرۋدىڭ جاڭا ەرەجەسى بەكىتىلدى، وندا قۇرىلىس جۇمىستارىن جۇرگىزۋ، اۋماقتى جيناۋ جانە اباتتاندىرۋ كەزىندە تازالىق ساقتاۋ مەن كۇتىپ ۇستاۋدىڭ نەگىزگى اسپەكتىلەرى كورسەتىلدى. قۇجاتتا جەدەل دامىپ كەلە جاتقان قالانىڭ جايى ەسكەرىلگەن، دەپ حابارلايدى almaty-akshamy.kz
اتاپ ايتقاندا، پۋنكتتىڭ ءبىرى بالالار مەن سپورت الاڭىن كۇتىپ ۇستاۋعا قاتىستى. الماتىنىڭ كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆتىڭ ايتۋىنشا، الاڭدى ءتيىستى تەحنيكالىق جاعدايدا ۇستاۋ جانە قىس مەزگىلىندە قاردان ۇنەمى تازالاۋ بويىنشا تالاپ ەنگىزىلگەن. الاڭداعى قورشاۋلار مەن قۇرىلىس جىلىنا كەمىندە ءبىر رەت سىرلانۋى كەرەك.
«بالالار مەن سپورت الاڭىنىڭ يەسى قاۋىپسىزدىكتى جانە تۇراقتى تۇردە كۇتىپ ۇستاۋدى قامتاماسىز ەتۋگە ءتيىس. قاۋىپسىزدىك ماقساتىندا نىسانداردى ترانزيتتىك جاياۋ جۇرگىنشىلەر قوزعالىسىنان، وتپەلەردەن، بۇرىلىس الاڭدارىنان، قوناق تۇراقتارىنان جانە قوقىس الاڭدارىنان وقشاۋلاۋ قاجەت. بالالار الاڭىنا كىرەبەرىستى جول مەن كوشە جاقتان ۇيىمداستىرۋعا تىيىم سالىنادى»، - دەدى د.اشكەنوۆ.
ويىن الاڭدارىن جاڭارتۋ كەزىندە جاراقاتتانباس ءۇشىن الاڭنىڭ اۋماعىندا تامىرلاردىڭ شىعىپ تۇرعانىن نەمەسە تومەن بۇتاقتاردىڭ، ەسكى، كەسىلگەن جابدىق قالدىعىنىڭ، سونداي-اق تەمىر بوگەتتەردىڭ بولماۋىنا ءمان بەرىلەدى. ىرگەلەس اۋماقتاردى رەكونسترۋكسيالاۋ كەزىندە بالالار الاڭدارى جۇمىس جۇرگىزىلىپ جاتقان جەر مەن قۇرىلىس ماتەريالدارىن ساقتاۋ ورىندارى وقشاۋلانادى.
سونىمەن قاتار، اۆتوتۇراق اۋماقتارى ءۇشىن جاڭا نورمالار ەنگىزىلۋدە. وزدەرىڭىزگە ءمالىم، قالادا اۆتوكولىكتى قىسقا جانە ۇزاق مەرزىمگە قويۋ، كوشە بويىندا، «قالتا» تۇرىندەگى جولدىڭ جيەگىنە قويۋ سىندى اۆتوتۇراقتىڭ سان ءتۇرى بار.
جالپى پايدالانىمداعى جەرلەر مەن اۋلا اۋماعىن جوسپارلاۋ كەزىندە كوگالدى اۆتوتۇراققا اينالدىرماس ءۇشىن فيزيكالىق كەدەرگىلەر ورناتۋ قاجەت. بۇعان قوسا، كۆارتال مەن اۋلا ىشىندەگى جولعا تەمىربەتون بلوك، باعانا، قورشاۋ جانە باسقا دا قۇرىلىمدى ءوز بەتىنشە ورناتۋعا تىيىم سالىنادى. ءۇي ماڭىنداعى اۋماقتا اۆتوموبيلدەردىڭ تروتۋاردا، بالالار الاڭىندا، كوگالدا جانە كونتەينەرلىك الاڭدا توقتاۋىنا جانە قويۋىنا رۇقسات جوق. بۇزىلىپ، جۇرمەي تۇرعان كولىكتى قويۋعا تىيىم سالىنادى.
ەستەرىڭىزگە سالا كەتەيىك، 2024 جىلى 19 شىلدەدە VIII سايلانعان ءماسليحاتتىڭ كەزەكتەن تىس ءححى سەسسياسىندا دەپۋتاتتار الماتى قالاسى اۋماعىن كورىكتەندىرۋدىڭ جاڭا ەرەجەسىن بەكىتتى. بۇل ءىس-شارالار «تازا قازاقستان» رەسپۋبليكالىق اكسياسىنىڭ ماقساتنا سايكەس كەلەتىن ءقاۋىپسىز، ىڭعايلى ءارى ەكولوگيالىق جايلى قالالىق ورتا قۇرۋعا باعىتتالعان.