قازاقستاندا العاش رەت ۇرىقتىڭ نەسەپ شىعارۋ جۇيەسىنىڭ تۋا بىتكەن اقاۋلارىن تۇزەتۋ ءۇشىن جاتىرىشىلىك ارالاسۋ جۇرگىزىلدى.
وپەراسيا شەتەلدىك مامانداردىڭ قاتىسۋىمەن ماستەر-كلاسس شەڭبەرىندە UMC كلينيكاسىنىڭ بازاسىندا انا مەن بالا ۇلتتىق عىلىمي ورتالىعىندا وتكىزىلدى، دەپ حابارلايدى almaty-akshamy.kz دەنساۋلىق ساقتاۋ مينيسترلىگىنە سىلتەمە جاساپ.
جۇكتىلىكتىڭ 19-شى اپتاسىندا ايەلدە ۇرىقتىڭ دامۋ اقاۋى انىقتالدى. پرەناتالدىق كونسيليۋم ۇرىقتىڭ قۋىعىن جاتىرىشىلىك درەناجداۋ قاجەتتىلىگى تۋرالى شەشىم قابىلدادى. بۇل وكپە گيپوپلازياسىنىڭ الدىن الۋ جانە بولاشاق نارەستە بۇيرەگىنىڭ قالىپتى جۇمىسىن ساقتاۋ ءۇشىن قاجەت.
وپەراسيا ءساتتى ءوتتى. پاسيەنتتىڭ جاعدايى تۇراقتى، ۇرىقتىڭ دامۋىن ديناميكالىق بايقاۋ مەن باقىلاۋ جوسپارلانعان.
فەتالدىق حيرۋرگيا - جاڭا تۋعان نارەستەلەردىڭ ءولىمى مەن مۇگەدەكتىگىنىڭ الدىن الۋ ءۇشىن جاتىرىشىلىك وپەراسيالار مەن ءينۆازيۆتى ارالاسۋلاردى قامتيتىن مەديسيناداعى جاڭا باعىت. مۇنداي ەمشارالار الەمنىڭ جەتەكشى مەديسينالىق ورتالىقتارىندا جۇزەگە اسىرىلادى.
ەندى مۇنداي جەدەل ارالاسۋلار انا مەن بالا ۇلتتىق عىلىمي ورتالىعىندا جۇزەگە اسىرىلادى، وندا بۇل ءۇشىن بارلىق جاعداي جاسالعان. بولاشاقتا مۇندا ديافراگمالىق جارىقتى، تتس سيندرومىن، سەگىزكوز-قۇيمىشاق تەراتوماسىن جانە تيىمدىلىگى الەمدىك كلينيكالىق پراكتيكامەن دالەلدەنگەن باسقا دا دامۋ اقاۋلارىن تۇزەتۋ بويىنشا وپەراسيالار جۇرگىزۋ جوسپارلانۋدا.