الماتىداعى بەلسەندى ۇزاق ءومىر ءسۇرۋ ورتالىعىنا ەگدە جاستاعى 12 مىڭ ادام بارادى
مەگاپوليستە بارلىعى 10 بەلسەندى ۇزاق ءومىر ءسۇرۋ ورتالىعى بار، ولاردىڭ 9-ى اۋدانداردا ورنالاسقان. وتكەن جىلى قالالىق ورتالىق اشىلعان بولاتىن. بۇل تۋرالى الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى مەن «بەلسەندى ۇزاق ءومىر سۇرۋ ورتالىعىنىڭ» وكىلدەرى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا ءسوز ەتتى.
سپيكەرلەردىڭ سوزىنشە، ورتالىقتاردا وتكەن جىلى 33 مىڭ زەينەتكەر تىركەلگەن، 649 مىڭنان استام ءتۇرلى قىزمەت تۇرلەرى كورسەتىلگەن. بيىل 219 مىڭ قىزمەت كورسەتىلدى.
«بەلسەندى ۇزاق ءومىر ءسۇرۋ ورتالىقتارىنىڭ نەگىزگى باسىمدىقتارىنىڭ ءبىرى - قارت ادامداردىڭ دەنساۋلىعىن كۇتۋ. ءاربىر ورتالىقتىڭ شتاتىندا دارىگەر، پسيحولوگ، نۋتريسيولوگ جانە گەرونتولوگ بار، بەلسەندى ۇزاق ءومىر ءسۇرۋ ورتالىقتارى ساپالى مەديسينالىق كومەك پەن كەڭەيتىلگەن كنسۋلتاسيالار بەرۋ ءۇشىن مەديسينالىق ۇيىمدارمەن جانە مەديسينالىق جوعارى وقۋ ورىندارىمەن بەلسەندى ىنتىماقتاستىقتا جۇمىس جاسايدى. سونداي-اق، ءبىز فيزيكالىق بەلسەندىلىك جاتتىعۋلارىن ۇيىمداستىرامىز، سالاۋاتتى ءومىر سالتىن ناسيحاتتايتىن جانە اۋرۋلاردىڭ الدىن الۋعا باعىتتالعان ءىس-شارالار وتكىزەمىز»، - دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى قاليبەك اقىلبەكوۆ.
الماتى قالاسىنىڭ «بەلسەندى ۇزاق ءومىر ءسۇرۋ ورتالىعىنىڭ» ديرەكتورى ساۋلە بەكەتايەۆانىڭ ايتۋىنشا، جوبانىڭ ماقساتى – قارت ادامداردىڭ بوس ۋاقىتتارىن ءتيىمدى ۇيىمداستىرۋ، الەۋمەتتىك-مەديسينالىق كومەك كورسەتۋ جانە ولاردى بەلسەنى شىعارماشىلىق جانە قوعامدىق ومىرگە تارتۋ.
«بۇگىنگى تاڭدا بەلسەندى ۇزاق ءومىر ءسۇرۋ ورتالىقتارى الماتىنىڭ بارلىق اۋداندارىندا جۇمىس ىستەيدى، بۇل قوعامدىق ءومىردىڭ ءتۇرلى سالالارىنا قاتىساتىن قارت ادامداردىڭ اۋقىمىن كەڭەيتۋگە، بەلسەندى ازاماتتاردىڭ كوبەيۋى مەن ولاردىڭ ءومىر ساپاسىنىڭ ارتۋىنا مۇمكىندىك بەردى. جاستارى ەگدە تارتقان ادامدارعا ارنالعان ورتالىقتار اشۋ ارقىلى ءبىز دە جاپونيا ەلىندەگى سياقتى جەتىستىكتەرگە جەتە الامىز. جاپوندىقتاردىڭ ورتاشا ءومىر ءسۇرۋ جاسى – 84،2، ال قازاقستاندا – 75 جاس»، - دەدى ول.
ورتالىقتاردا ءبىلىم بەرۋ، ساۋىقتىرۋ، بوس ۋاقىتىن وتكىزۋ ءىس-شارالارى تەگىن كورسەتىلەدى، ال بىلىكتى ماماندار قارتتارعا بارلىق كەزەڭدەردە كومەك كورسەتەدى.
قارتتارعا كەڭىنەن كورسەتىلەتىن قىزمەتتەر اراسىندا گەرياتر، گەرونتولوگ دارىگەرلەردىڭ، پسيحولوگ مامانداردىڭ كومەگى بار، ەمدىك دەنە شىنىقتىرۋ، ايكۋنە گيمناستيكاسى، يوگا، كينەزيولوگيا، سكانديناۆيالىق ءجۇرىس سىندى قىزمەتتەر كورسەتىلەدى. سونداي-اق، كلاسسيكالىق جانە زاماناۋي بي، ينتەللەكتۋالدى ويىنداردان – شاحمات، توعىزقۇمالاق بار، سۋرەت، گرافيكا، قول ەڭبەگى، IT ساۋاتتىلىق، ۆوكال، حور جانە ت.ب.قاتىسىپ، ۋاقىتتى ءتيىمدى وتكىزۋگە بولادى.
«سونىمەن قاتار، كوپشىلىگى اعىلشىن جانە قازاق ءتىلىن ۇيرەنەدى، بي جانە مۋزىكالىق انسامبلدەر دە قۇرىلعان. زەينەتكەرلەردى كوبى مەملەكەتتىك ەلەكتروندى قىزمەت تۇرلەرىن مەڭگەرگىسى كەلەدى، ول ءۇشىن سمارتفون جانە كومپيۋتەرلىك ساۋاتتىلىق كۋرستارى قاراستىرىلعان. دەنساۋلىقتى دارى-دارىمەكسىز نىعايتۋ بويىنشا ساباقتار دا سۇرانىسقا يە بولىپ شىقتى، ولاردىڭ بارىسىندا زەينەتكەرلەرگە دۇرىس تاماقتانۋدى ۇيىمداستىرۋ، ديەتولوگيا جانە نۋتريسيولوگيا نەگىزدەرى، بيۋدجەتتى راسيونالدى قۇرۋبويىنشا الەۋمەتتىك-ەكونوميكالىق جانە زاڭدى كەڭەستەر بەرىلگەن»، - دەپ ءبولىستى سپيكەر.
ورتالىقتا جۇزەگە اسىرىلىپ جاتقان بىرەگەي ءارى قىزىقتى جوبالاردىڭ ءبىرى – اگروكراۋدسورسينگ. بيىل وعان قاتىسۋعا 80 ادام ءوتىنىش بىلدىرگەن جانە ءوز ۋچاسكەلەرىن العان.
«الماتى وبلىسىنداعى 29 گەكتار جەر ۋچاسكەسىندە ءبىزدىڭ زەينەتكەرلەر جەمىس-جيدەك پەن باۋ-باقشا وسىرەدى، اۋىلشارۋاشىلىق ەڭبەگىنە تارتىلعان، وسى ارقىلى تابيعاتتا دەم الىپ، دەنساۋلىقتارىن نىعايتۋ مۇمكىندىگىنە يە بولادى. قارتتارعا ولاردى نەمەرەلەرى دە كومەكتەسەدى، ولار ەگىندى بىرگە سۋارىپ، كۇتىپ-باپتايدى. قىسقىعا قامدارىن دا جاسايدى. ال قالعان ءونىمدى «باقىتتى وتباسى» ورتالىقتارىنا قاتىسۋشى كوپ بالالى انالار اشقان الەۋمەتتىك دۇكەندەر ارقىلى ساتادى»، - دەدى س.بەكەتايەۆا.
بەلسەندى ۇزاق ءومىر ءسۇرۋ ورتالىقتارىنا بارۋ ارقىلى قارت ادامدار وزدەرىمەن قىزىعۋشىلىقتارى ءبىر ادامداردى تابادى، ءتىپتى وتباسىن قۇراتىندا دا كەزدەسىپ جاتادى.