الماتىدا ءوتىپ جاتقان رەفەرەندۋمدا ءومىر كورگەن، قازىنالى قارتتارىمىز ساياسي ناۋقاندا بەلسەندىلىك تانىتىپ، ءوز داۋىستارىن بەرىپ جاتىر.
ەلىمىزدە 90-نان اسقان، 100-گە كەلگەن قاريالارىمىزعا ۇيدە داۋىس بەرۋ مۇمكىندىگى جاسالعانىنا قاراماستان، سايلاۋ ۋچاسكەلەرىنە ارنايى كەلىپ، بيۋللەتەندى وزدەرى تولتىرىپ، جاشىككە وزدەرى سالىپ جاتقان قاريالارىمىز دا از ەمەس.
سولاردىڭ ءبىرى – المالى اۋدانىنداعى №86 سايلاۋ ۋچاسكەسىنە كەلگەن، 1934 جىلى تۋعان ابىلاكىم اۋباكيروۆ.
90 جاستاعى اقساقال ءومىرىنىڭ سانالى عۇمىرىندا بارلىق ساياسي ناۋقاندارعا بەلسەندى اتسالىسىپ كەلە جاتىر. بۇگىن دە سول ادەتىنەن جاڭىلماي، ءوزى تىركەلگەن №86 سايلاۋ ۋچاسكەسىنە جۇبايىمەن بىرگە كەلدى. ابىلاكىم اتا كەزىندە دىنمۇحاممەد قونايەۆپەن بىرگە قىزمەت ەتىپ، ەل مۇددەسى ءۇشىن تالاي يگى ىستەرگە اتسالىسقان.
– ديماش اتالارىڭمەن بىرگە 15 جىلداي قىزمەتتەس بولدىم. ۇلت مۇددەسىن قورعاۋعا كەلگەندە ەشكىمگە ەسە جىبەرمەگەن سول تۇلعانى ءومىرىمنىڭ ۇلگىسى سانايمىن. سەندەر دە ادال بولىڭدار! ۇلتقا ادال قىزمەت ەتىڭدەر! ەڭبەكتەرىڭ جەمىستى، ومىرلەرىڭ كەلىستى بولسىن! – دەپ، ابىلاكىم اتا سايلاۋ ۋچاسكەسىندە قىزمەت ەتىپ جۇرگەن جاندار مەن داۋىس بەرۋگە كەلگەن تۇرعىندارعا اق باتاسىن بەردى. سونىمەن قاتار، ول الماتىلىقتاردى ەل بولاشاعىنا بەي-جاي قاراماي، وسى ماڭىزدى ناۋقانعا بەلسەندى اتسالىسۋعا شاقىردى.