الماتىدا قالا كۇنىنە وراي «الماتىنىڭ سيمۆولى – سىيلىققا» اتتى اكسيا ءوتتى. ءىس-شارانى الماتى قالاسىنىڭ تۋريزم باسقارماسى، الماتى حالىقارالىق اۋەجايى جانە ق ر ۇقك الماتى قالاسى شەكارالىق باقىلاۋ باسقارماسى بىرلەسىپ ۇيىمداستىردى.
پاسپورتتىق باقىلاۋ ايماعىندا حالىقارالىق رەيستەردىڭ جولاۋشىلارىنا الماتىنىڭ جىلۋى مەن قوناقجايلىلىعىن بىلدىرەتىن «اپورت» سۇرىپتى المالار ۇسىنىلدى. اكسيا شامامەن 10 مىڭ جولاۋشىنى جانە 50-دەن استام رەيستى قامتىدى.
قالالىق تۋريزم باسقارماسىنىڭ مالىمەتىنشە، بۇنداي اكسيالاردى وتكىزۋ الماتىنى تۋريستىك باعىت رەتىندە تارتىمدى ەتۋدە ماڭىزدى ءرول اتقارادى.
«الماتى ورتالىق ازيانىڭ قارجىلىق، ساۋدا-ەكونوميكالىق جانە مادەني-بىلىم بەرۋ ورتالىعى. قالا تابيعي رەسۋرستارىمەن، باي تاريحي، مادەني مۇراسىمەن تۋريستەردى تارتادى. مۇندا حالىقارالىق دەڭگەيدەگى ءىرى فەستيۆالدەر مەن كونسەرتتەر وتەدى.
«الماتىنىڭ سيمۆولى – سىيلىققا» اكسياسى شەتەلدىك تۋريستەردى قالانىڭ داستۇرىمەن، مادەنيەتىمەن تانىستىرۋدا العاشقى وڭ اسەر قالدىرۋدى كوزدەيدى»، - دەپ اتاپ ءوتتى ۇيىمداستىرۋشىلار.
