الماتى ەكونوميكاسىن ودان ءارى ءارتاراپتاندىرۋ
ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ اقپاراتتىق الاڭىندا الماتى اكىمى ەربولات دوسايەۆتىڭ قاتىسۋىمەن باسپا ءسوز ءماسليحاتى ءوتىپ جاتىر، دەپ حابارلايدى Almaty-akshamy.kz.
وندا قالا اكىمى ەكونوميكانى ءارتاراپتاندىرۋدا ىسكە اسىرىلاتىن جوبالاردى اتادى.
«ەل پرەزيدەنتىنىڭ الماتى قالاسىنىڭ ەكونوميكاسىن ءارتاراپتاندىرۋ جونىندەگى تاپسىرماسى شەڭبەرىندە قازىرگى زامانعى ەكولوگيالىق تەحنولوگيالاردى پايدالانا وتىرىپ، وڭدەۋ ونەركاسىبىن دامىتۋعا باسا نازار اۋدارىلاتىن بولادى. شاعىن جانە ورتا بيزنەستى قولداۋ جانە الماتىنىڭ يندۋستريالىق ايماعىن كەڭەيتۋ (2 فازا) بويىنشا بەلسەندى جۇمىستار جۇرگىزىلۋدە»، - دەدى اوماتى اكىمى ە.دوسايەۆ.
شاھار باسشىسىنىڭ ايتۋىنشا، جىل باسىنان بەرى باسىم باعىتتار بويىنشا جوسپارلانعان 3 مىڭ جوبادان 783 جوبا قولداۋ تاپقان.
فاكتورينگتىك مامىلەلەردى قارجىلاندىرۋ ءۇشىن «دامۋ» قورىمەن بىرلەسىپ، قوسىمشا 3 ملرد. تەڭگە ءبولىندى. شاعىن جانە ورتا بيزنەستى كرەديتتەۋ 59،6%-كە، سونداي-اق بەلسەندى جۇمىس ىستەيتىن بيزنەس سۋبەكتىلەرىنىڭ سانى 38،6%-كە ءوستى.
«قازىرگى ۋاقىتتا الماتىنىڭ يندۋستريالىق ايماعىندا 9،7 مىڭ جۇمىس ورنىن اشا وتىرىپ، 344 ملرد. تەڭگەگە 19 جوبا ىسكە اسىرىلۋدا. بيىل 14 جوبا (1،2 مىڭ جۇمىس ورنىن قۇرا وتىرىپ، 30 ملرد. تەڭگەگە) پايدالانۋعا بەرىلەتىن بولادى. الماتىنىڭ يندۋستريالىق اۋماعىن كەڭەيتۋ ءۇشىن ينجەنەرلىك-كوممۋنيكاسيالىق ينفراقۇرىلىم قۇرىلىسىنا جوبالاۋ-سمەتالىق قۇجاتتاما ازىرلەۋ جۇرگىزىلۋدە»، - دەدى قالا باسشىسى.
2023 جىلدىڭ قورىتىندىسى بويىنشا قالا ەكونوميكاسىنا باسىم سالالاردىڭ ۇلەسى 23،4%-كە دەيىن ۇلعايادى (وڭدەۋ ونەركاسىبى، تۋريزم، كرەاتيۆتى يندۋستريالار جانە IT، 2022 جىلى – 22،7%).