«Almaty clean & green»: قالانىڭ بارلىق اۋدانىندا 10 مىڭنان استام اعاش وتىرعىزىلدى
الماتىدا «تازا قازاقستان» رەسپۋبليكالىق باعدارلاماسى مەن «الماتى – ءبىزدىڭ ورتاق ءۇيىمىز» قالالىق ناۋقانى اياسىندا «Almaty clean & green» اتتى اۋقىمدى تازالىق جانە كوگالداندىرۋ اكسياسى ءوتتى. ءىس-شارانىڭ باستى ماقساتى – قالا ەكولوگياسىن جاقسارتۋ جانە كوگالداندىرۋ جۇمىستارىن جۇرگىزۋ، دەپ حابارلايدى aqshamnews.kz
«Almaty clean & green» اكسياسى قالا تۇرعىندارىن بىرىكتىرىپ، ولار كوشەلەردى، قوعامدىق ورىنداردى، ساياباقتاردى، سكۆەرلەردى جانە وزەن جاعالاۋلارىن تازالاۋ جۇمىستارىنا بەلسەندى قاتىستى. سونىمەن قاتار، سەنبىلىك بارىسىندا اعاشتار مەن بۇتالار وتىرعىزىلدى. اكسياعا الماتى قالاسىنىڭ اكىمى ەربولات دوسايەۆ، ءماسليحات دەپۋتاتتارى، مادەنيەت قايراتكەرلەرى، سپورتشىلار، جاستار مەن قوعامدىق ۇيىم وكىلدەرى، ەكوبەلسەندىلەر جانە قالا تۇرعىندارى قاتىستى.
تازارۋ كۇنىندە وتكەن ەكولوگيالىق اكسياعا 50 مىڭنان استام تۇرعىن، 1 200-گە جۋىق كوممۋنالدىق قىزمەتكەرلەر قاتىسىپ، 350-دەن استام ارنايى تەحنيكا جۇمىلدىرىلدى. اۋقىمدى تازالىق جۇمىستارى بارىسىندا ساياباقتار، گۇلزارلار، اۋلالار جانە دەمالىس ورىندارى تازارتىلىپ، 8 مىڭ تەكشە مەتردەن استام قوقىس جينالىپ، قالا اكىمدىگى تاراپىنان ارنايى پوليگونعا شىعارىلدى.
«Almaty clean & green» اكسياسىنىڭ ماڭىزدى ناتيجەسى دەپ الما، المۇرت، شەگىرشىن، قاراعان، ۇيەڭكى جانە شاعان سىندى 10 مىڭنان استام اعاش وتىرعىزۋدى ايتۋعا بولادى. اكسيا وتكەن ورىنداردا مادەني-ويىن-ساۋىق باعدارلاماسى ۇيىمداستىرىلدى.
ەكواكسياعا قاتىسقان قالا تۇرعىندارى مەن ەسترادا جۇلدىزدارى ويىن ءبولىسىپ، الماتىلىقتاردى تۋعان قالاسىنا قامقورلىق كورسەتۋگە شاقىردى.
ەكولوگيالىق باستامالارىمەن تانىمال الماتىلىق ەۆگەنيي مۇحامەدجانوۆ ەكولوگيالىق مادەنيەتتىڭ ماڭىزدىلىعىن اتاپ ءوتتى.
«ەكولوگيالىق مادەنيەتتى قالىپتاستىرۋ – قالامىزدى تۇرلەندىرۋدىڭ نەگىزگى قادامى. بۇل الماتىنىڭ ينۆەستيسيالىق تارتىمدىلىعىن، تۋريستىك الەۋەتىن جانە جالپى ءومىر ساپاسىن ارتتىرادى. ءبىز تۋعان قالامىز ءۇشىن قولدان كەلگەننىڭ ءبارىن جاساۋعا دايىنبىز»، – دەدى ەكولوگ.
قوعام قايراتكەرى، قحا مۇشەسى رۋستام كايرىيەۆ مۇنداي شارالاردىڭ وسكەلەڭ ۇرپاقتى تاربيەلەۋدەگى ماڭىزدىلىعىنا توقتالدى.
«ءبىز تەك قوقىس جيناپ قويماي، ەكولوگيالىق ساناسى جوعارى قوعام قالىپتاستىرۋدىڭ نەگىزىن قالاپ جاتىرمىز. بۇگىن وسىنداي يگى ىسكە ۇلەس قوسقانىما قۋانىشتىمىن. ءبىز بىرگە سۇيىكتى قالامىزدى تازا ءارى جايلى ەتە الامىز، ويتكەنى الماتى – ءبىزدىڭ ورتاق ءۇيىمىز!»، – دەدى ول.
قازاقستاننىڭ ەڭبەك سىڭىرگەن قايراتكەرى ايگۇل قوسانوۆا وسىنداي باستامالاردىڭ ماڭىزىن اتادى.
«ارينە، بۇل اۋقىمدى ءارى ماڭىزدى جۇمىس، ويتكەنى سۇيىكتى قالامىزدىڭ تازالىعى بىزگە، ونىڭ تۇرعىندارىنا بايلانىستى. سول سەبەپتى تۇراقتى تۇردە وسىنداي ءىس-شارالارعا قاتىسىپ تۇرامىز. ويتكەنى ءبارىمىز وسىندا ءومىر ءسۇرىپ جاتىرمىز، ال قالامىزدىڭ تازالىعى – ءاربىرىمىز ءۇشىن ماڭىزدى. ۇيدە وتىرماي، كىرەبەرىستى، اۋلانى، كوشەڭىزدى تازالاڭىز!» – دەپ ول تۇرعىندارعا ۇندەۋ جاسادى.
الاتاۋ اۋدانىندا وتكەن ەكولوگيالىق اكسياعا قاتىسقان ءانشى وكتەم التايەۆ مۇنداي ءىس-شارالاردىڭ سەرگىتىپ، كوتەرىڭكى كوڭىل-كۇي سىيلايتىنىن ايتتى.
«مەن الماتىنىڭ تازالىعىنا ۇلەس قوسۋ ءۇشىن قاتىسىپ وتىرمىن. مۇندا ناعىز مەرەكەلىك اتموسفەرا ورناعان. ناۋرىز مەيرامى مەن قاسيەتتى رامازان ايىنىڭ وسى ىس-شارامەن تۇسپا-تۇس كەلۋى ەرەكشە اسەر سىيلاپ تۇر. اكسيا جوعارى دەڭگەيدە وتۋدە. الماتىنى جاقسى كورەيىك، ونىڭ تازالىعىن ساقتايىق – ءبىزدىڭ سۇيىكتى قالامىز ءاردايىم جۇرەگىمىزدە!» – دەدى ونەرپاز.
قازاقستاننىڭ ەڭبەك سىڭىرگەن قايراتكەرى، ەسترادا جانە وپەرا ءانشىسى تولقىن زابيروۆا الماتىلىقتاردى مەرەكەمەن قۇتتىقتاپ، اكسياعا بەلسەنە قاتىستى.
«بۇگىن الماتى قالاسىنىڭ تۇرعىندارى مەن قوناقتارى ءۇشىن ەرەكشە، ۇمىتىلماس كۇن. ءبارىمىز ءبىر وتباسى سەكىلدى بىرىگىپ، قالامىزدى كوركەيتۋگە كىرىستىك: اعاش وتىرعىزىپ، اينالانى تازارتىپ جاتىرمىز. سۇيىكتى قالامىز الماتىنى تازا ۇستايمىز، ويتكەنى الماتى – ءبىزدىڭ ءۇيىمىز، ال ءۇي تازا بولۋى كەرەك. سوندىقتان قوقىس تاستامايىق، تۇكىرمەيىك، جامان ارەكەت جاسامايىق، قالامىزدى ايالاۋىمىز كەرەك. الماتى شىنىمەن دە الەمدەگى ەڭ ادەمى، ەڭ كورىكتى قالانىڭ ءبىرى!»، – دەدى ول.
قوعام قايراتكەرى بەكنۇر قيسىقوۆ مۇنداي ءىس-شارالاردىڭ ازاماتتىق بەلسەندىلىكتى نىعايتاتىنىن اتاپ ءوتتى.
«ءبىز وسى ءىس-شارا ارقىلى قالاعا قامقورلىق جاساۋ مادەنيەتىن قالىپتاستىرامىز. Almaty Clean & Green – جاي عانا ەكولوگيالىق باستاما ەمەس، بۇل – جاناشىر ادامداردى بىرىكتىرەتىن قوزعالىس»، – دەدى ول.
قازاقستاننىڭ ەڭبەك سىڭىرگەن قايراتكەرى سۇلۋشاش نۇرماعامبەتوۆا سەنبىلىكتىڭ تاربيەلىك مانىنە توقتالدى.
«جاستاردى وسىنداي ءىس-شارالارعا تارتۋ وتە ماڭىزدى. بۇل تەك تازالىق جۇمىستارى ەمەس، ازاماتتىق جاۋاپكەرشىلىك پەن تۋعان جەرگە دەگەن سۇيىسپەنشىلىكتىڭ مەكتەبى. مەن الماتىدا 50 جىلعا جۋىق ۋاقىت تۇرامىن، قالامىزدىڭ ءاردايىم تازا بولعانىن قالايمىن!»، – دەدى ول.
تەاتر جانە كينو اكتريساسى ءمولدىر سەرىكباي شىعارماشىلىق ادامدارىنىڭ مۇنداي اكسيالارعا قاتىسۋىنىڭ ماڭىزدىلىعىن جەتكىزدى.
«ءبىز ونەر ادامدارى ساحنادا ماڭىزدى ماسەلەلەردى ءجيى كوتەرەمىز. ءبىراق بۇگىن مەن ونى ءىس جۇزىندە كورسەتۋدى ءجون كوردىم. قالاعا دەگەن ماحاببات وعان قامقورلىق جاساۋدان باستالادى»، – دەدى ول.