مەگاپوليستە قالا اكىمى ەربولات دوسايەۆتىڭ تاپسىرماسى بويىنشا قۇرىلىستى، اسىرەسە تاۋلى ايماقتاعى قۇرىلىسقا باقىلاۋدى كۇشەيتۋ جالعاسۋدا، دەپ حابارلايدى almaty-akshamy.kz.
الماتى قالاسىنىڭ قالا قۇرىلىسىن باقىلاۋ باسقارماسى جىل باسىنان بەرى قالانىڭ قۇرىلىس نىساندارىندا 377 جوسپاردان تىس تەكسەرۋ جۇرگىزىپ، زاڭبۇزۋشىلىقتاردى جويۋعا 211 ۇيعارىم بەردى. 2023 جىلى 1074 تەكسەرۋ جۇرگىزىلىپ، 634 نۇسقاما بەرىلدى.
- ۆەدومستۆو وتكەن جىلدىڭ باسىنان باستاپ سوتقا قۇرىلىس نورمالارىن بۇزعانى ءۇشىن 206 تالاپ ارىز جىبەرىلگەنىن حابارلادى. ونىڭ 100ء-ى بويىنشا تالقىلاۋلار بۇگىنگى كۇنگە دەيىن جالعاسۋدا.
- بۇعان دەيىن قالا اكىمى ەربولات دوسايەۆ تاۋلى جەردە زاڭسىز قۇرىلىستى باقىلاۋدى كۇشەيتۋدى تاپسىرعان ەدى. سوتقا زاڭسىز وبەكت بويىنشا 45 تالاپ-ارىز بەرىلدى. سونىڭ 36-سى بويىنشا بۇگىنگى كۇنگە باسقارمانىڭ تالاپ-ارىزى قاناعاتتاندىرىلدى.
- جالپى قالا بويىنشا تالاپ قويۋ قىزمەتىنىڭ ناتيجەلەرى بويىنشا وتكەن جىلدان باستاپ 28 زاڭسىز نىسان، ونىڭ ىشىندە بيزنەس-ورتالىقتار، مەيرامحانالار، جاپسارما قۇرىلىس پەن اۆتوسەرۆيستەر، سونداي-اق «مەچتا» مەن «KHAN» سياقتى ءىرى تۇرعىن ءۇي كەشەندەرى بۇزىلدى.
بۇدان وزگە قالا باسشىسىنىڭ باستاماسىمەن زاڭناماعا ينسپەكسيالاۋ شەڭبەرىندە قۇرىلىس جۇمىسىن توقتاتا تۇرۋ مۇمكىندىگىمەن قۇرىلىس كەزىندە بۇزۋشىلىقتاردى انىقتاۋعا جانە جولىن كەسۋگە مۇمكىندىك بەرەتىن "جەدەل دەن قويۋ شاراسى" جاڭا باقىلاۋ تەتىگىن ەنگىزۋ بويىنشا تۇزەتۋلەر ەنگىزىلەدى.
ەستەرىڭىزگە سالا كەتەيىك، 2022 جىلدىڭ ماۋسىم ايىندا قالا ءماسليحاتى اكىمدىكتىڭ باستاماسىمەن اۋماقتىڭ فۋنكسيونالدىق ايماقتارىن سالۋدىڭ قالا قۇرىلىسى رەگلامەنتتەرىن ىسكە اسىرۋ جوسپارىنا وزگەرىستەر ەنگىزدى. ول وزگەرىس بەتكەيلەرى 15 گرادۋستان اساتىن ۋچاسكەلەردە قۇرىلىسقا تىيىم سالۋدى كوزدەيدى.
قابىلدانعان وزگەرىستەر الماتى قالاسىنىڭ 2040 جىلعا دەيىنگى باس جوسپارىندا جانە ەگجەي-تەگجەيلى جوسپارلاۋدىڭ جاڭا جوبالارىندا كورىنىس تاپتى. قوعامدىق تالقىلاۋ قورىتىندىسى بويىنشا وعان قالا تۇرعىندارىنىڭ، ساراپشىلاردىڭ ءبىرقاتار ۇسىنىسى ەنگىزىلدى. ولاردىڭ ءبىرى — تاۋ بوكتەرىندەگى 4270 گەكتاردان استام جەردى رەكرەاسيالىق ايماققا اۋىستىرۋ. سوندا دا بۇل جەردە قۇرىلىسقا تىيىم سالىنادى.
الماتى قالالىق جوسپارلاۋ جانە ۋربانيستيكا باسقارماسىنىڭ مالىمەتى بويىنشا، تاۋ بوكتەرىندەگى جەردە وبەكتىلەردى جوبالاۋعا ازاماتتاردىڭ ءوتىنىشى نەگىزىندە سول ايماقتاعى توپىراقتىڭ ينجەنەرلىك-گەولوگيالىق دەرەگى بەرىلەدى. 2022 جىلى 36 نىساننىڭ قۇرىلىسىنا رۇقسات بەرىلمەسە، وتكەن جىلى – 89، ال بيىل – 32.
بيىلعى جىلدىڭ 29 ناۋرىزىندا وتكەن كەڭەستە قالا اكىمىنىڭ تاپسىرماسىنا سايكەس قالالىق جوسپارلاۋ جانە ۋربانيستيكا، سونداي-اق قالا قۇرىلىسىن باقىلاۋ باسقارمالارىنىڭ جانە اۋدان اكىمدىكتەرىنىڭ ماماندارى تاۋ بوكتەرىندەگى اۋماقتاردا ءوز بەتىنشە قۇرىلىس جۇرگىزەتىندەرگە تۇراقتى مونيتورينگ جۇرگىزۋگە ءتيىستى.
سونىمەن قاتار، زاڭنامانى جەتىلدىرۋ بولىگىندە مەملەكەت باسشىسىنىڭ تاپسىرماسى بويىنشا ازىرلەنەتىن قۇرىلىس كودەكسىنە قالا قۇرىلىسىن باقىلاۋ ورگاندارىنىڭ وكىلەتتىكتەرىن كۇشەيتۋ جونىندە ۇسىنىستار ەنگىزىلەدى. بۇل جەردە جەكە تۇرعىن ۇيلەردىڭ قۇرىلىسىن تەكسەرۋگە رۇقسات بەرۋ تۋرالى ايتىلىپ وتىر. ويتكەنى كەيبىر قۇرىلىس سالۋشىلار تاۋ بوكتەرىندە جەكە تۇرعىن ءۇي قۇرىلىسىنىڭ ورنىنا كوپ قاباتتى ءۇي تۇرعىزادى.
جالپى الماتىدا قۇرىلىس سالاسىندا ءتارتىپ ورناتۋ بويىنشا كەشەندى جۇمىس جالعاسادى.