وسى كۇنى الەۋمەتتىك جەلىدە كەز كەلگەن دۇنيەنى جاريالاپ، وزگەلەرمەن ءبولىسۋ قالىپتى قۇبىلىسقا اينالدى. ءتىپتى قاجىلىق ساپارىندا قۇلشىلىقتان گورى كونتەنتكە ءمان بەرەتىندەر قاتارى كوبەيگەندەي. قاسيەتتى مەكەنگە جولى تۇسكەندەر جاساعان قۇلشىلىقتارىن جەلىدە جاريالاۋعا اسىق...
سۋرەت: الەۋمەتتىك جەلىدەن، كوللاج
بۇرىن «مەككەگە بارىپ كەلىپتى» دەگەن اڭگىمە سيرەك ەستىلەتىن. ءقازىر الەۋمەتتىك جەلىلەردى اشساڭىز، قاجىلىقتاعى ءساتىن، قاعبانى اينالعان كەزىن، قارا تاستى سۇيگەن كەزدە كوزدەرىنە جاس العاندارىن فوتو جانە ۆيدەومەن ءبولىسىپ جاتقان انشى-بلوگەرلەر جەتەرلىك. ءار ءساتىن تاسپاعا تۇسىرەتىن موبيلوگرافى قاسىندا. ادامدار تاپتالىپ قالاتىنداي جاعدايدا جاپا-تارماعاي قاسيەتتى تاسقا ۇمتىلعاندا ءار ءساتتى تاسپاعا ءتۇسىرىپ الۋدىڭ ءوزى قۇلشىلىقتان اسىپ تۇسپەسە، كەم ەمەس. سوندا قۇلشىلىقتى جاريا ەتۋ – پارىزدى ورىنداۋ ما، الدە كونتەنت جاساۋ ما؟
سۋرەت: الەۋمەتتىك جەلىدەن، كوللاج
قاجىلىق – يسلامنىڭ بەس پارىزىنىڭ ءبىرى. مۇسىلمان بالاسىنا ومىرىندە ءبىر رەت قاجىلىق جاساۋ – اللانىڭ الدىنداعى مىندەت. دەسە دە، ءدىن ماماندارى جۇرەكپەن جاسالاتىن مۇنداي قۇلشىلىقتىڭ ماقتانعا اينالىپ، سىرت كوزگە جاريا ەتىلۋىن ونشا قۇپتامايدى.
قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمىنىڭ مامانى ەلبەك تاسبولات ۇلى بۇل تۋرالى بىلاي دەيدى:
«مەككەگە ادامدار ءارتۇرلى ماقساتپەن بارادى. كەيبىرى ساعىنىشپەن قايتا-قايتا بارسا، ول قۇپتالادى. ال ەندى بىرەۋلەر ماقتان ءۇشىن بارادى. بۇل دۇرىس ەمەس، ءتىپتى كۇناعا سەبەپ بولۋى مۇمكىن. شاماسى جەتپەي، ءوز وتباسىن، اينالاسىن قيىندىققا قالدىرىپ باراتىندار دا بار. مۇنداي ارەكەتتەر دە قۇپتالمايدى».
دەمەك، قاجىلىق – بىرەۋگە كورسەتۋ ءۇشىن ەمەس، شىنايى ىقىلاسپەن ساۋاپ ءۇشىن جاسالاتىن عيبادات.
شىمكەنت قالاسى باس يمامىنىڭ ورىنباسارى مۇحامەدجان ەستەمىروۆتىڭ دە بۇل ماسەلەگە قاتىستى پىكىرى ۇقساس:
«ءقازىر قاجىلىق سەرتيفيكاتىن تويدا سىيلاپ جۇرگەندەردى كورىپ ءجۇرمىز. بۇل – يگى نيەتتەن تۋعان ارەكەت بولۋى مۇمكىن. ءبىراق قاجىلىققا باراتىن ادام ارنايى دايىندىقتان ءوتۋى ءتيىس. ۋمراعا دا ءجيى بارىپ جۇرگەندەر كوپ. ءبىر بارعان سوڭ، ەكىنشىسىندە ەڭبەك ادامىن نەمەسە جاستاردى جىبەرۋ – ۇلكەن ساۋاپ».
ال بەلگىلى يمام نۇرلان بايجىگىت ۇلى قاجىلىقتان كەيىن ءدىن ناسيحاتتاۋعا كىرىسىپ، توپ جيناپ، كومپانيا اشاتىندارعا الاڭدايدى:
«ءدىني ۇكىمدى تەك ارنايى ءدىني ءبىلىمى بار ادام ايتۋى كەرەك. قاجىلىقتان سوڭ شاريعات ماسەلەسىنە ارالاسۋ – ءقاۋىپتى ءۇردىس. ءدىن – تەرەڭ ءىلىم. ونى تەك مامان جەتكىزۋى ءتيىس».
قاجىلىق پەن ۋمرانىڭ ايىرماشىلىعى قانداي؟
قاجىلىق – زۋل-حيججا ايىندا عانا وتەلەتىن پارىز قۇلشىلىق. ال ۋمرا – جىلدىڭ كەز كەلگەن ۋاقىتىندا جاسالاتىن «كىشى قاجىلىق». قوس قۇلشىلىق ءبىر جەردە جاسالعانىمەن، دارەجەسى بىردەي ەمەس.
بەلگىلى ءدىنتانۋشى، تەولوگ، ۇستاز ارمان قۋانىشبايەۆتىڭ پىكىرىنشە، «ۋمرا – قاجىلىقتان گورى، كوبىنە زيارات سيپاتتى امال». ونىڭ كىشى قاجىلىق دەپ اتالۋىنىڭ ءمانى دە وسىندا.
قاجىلىقتا ارافا تاۋىندا تۇرۋ، مۇزداليفادا تۇنەۋ، مينادا بىرنەشە كۇن بولۋ سەكىلدى راسىمدەر بار. بۇل امالدار قاجىلىقتى كەمىندە ءتورت كۇنگە سوزادى. ال ۋمرا بىرنەشە ساعات ىشىندە اياقتالۋى مۇمكىن.
قاجىلىقتىڭ «ءتاماتتۋ» تۇرىندە ادام اۋەلى ۋمرا جاساپ، كەيىن پارىز قاجىلىعىن وتەيدى. بۇل – ۇلكەن ساۋاپقا كەنەلۋدىڭ مۇمكىندىگى.
قاجىلىققا بارۋ وڭاي ما؟
ءيا، بۇگىندە قاجىلىققا جول اشىق. ءتۇرلى تۋريستىك اگەنتتىكتەر قىزمەت كورسەتىپ، قاجىلارعا ارنايى گيدتەر جول باستاپ جۇرەدى. ەگەر 1991 جىلى قازاقستاننان نەبارى 21 ادام قاجىلىققا اتتانسا، بۇگىندە بۇل كورسەتكىش بىرنەشە مىڭعا جەتتى. بيىلدىڭ وزىندە 4 500 وتانداسىمىز قاجىلىق پارىزىن وتەگەن.
الايدا سوڭعى جىلدارى قاجىلىق ساپارىن بيزنەسكە، ءتىپتى الاياقتىققا اينالدىرعاندار دا كەزدەستى. وسىدان بىرەر جىل بۇرىن الماتىدا Kausar Travel كومپانياسى قاجىلىققا بارامىز دەگەن 57 ادامدى جولدا قالدىرعانى ەستە. ءار قاجىدان كەمىندە 1000 دوللار الىپ، ۋادە ەتكەن ساپارىن ورىنداماي، ءبىراز ادامدى سان سوقتىرىپ كەتكەن ەدى.
بيىل، قاڭتار ايىندا وسىعان ۇقساس جاعداي قايتالاندى. «جازيرا تريەۆەل» اتتى تۋريستىك فيرما 180 ادامدى قاسيەتتى مەكەنگە اپارامىز دەپ الداپ، اقىر سوڭىندا قاراجاتتان دا، قاجىلىقتان دا «قاقتى».
قاجىلىق قۇنى قانشا؟
عالامتورداعى اقپاراتقا جۇگىنسەك، كىشى قاجىلىق، ياعني ۋمرا ساپارىنا «ستاندارت» پاكەت (9-14 كۇن) قۇنى - 700 مىڭ - 1ملن. تەڭگە ارالىعىندا. ەندى ءبىر تۋريستىك فيرمالاردا بۇل باعا 2 ملن 900 مىڭنان باستالىپ، 4 ملن.300 مىڭنان اسادى ەكەن. ال ۇلكەن قاجىلىقتىڭ ورتاشا باعاسى 3 ملن.تەڭگەدەن باستالىپ، 7 ملن تەڭگەگە دەيىن جەتۋى مۇمكىن.
قاجىلىق – ساياحات ەمەس
قاجىلىقتى بيزنەسكە اينالدىرماۋ كەرەك. بۇل – ءدىن ماماندارىنىڭ ورتاق پىكىرى. قاجىلىق – بىرەۋگە كورسەتۋ نەمەسە ماقتان ءۇشىن جاسالاتىن ساياحات تا ەمەس. سوندىقتان دا ونى شىنايىلىقپەن، ءدىني ساۋاتتىلىقپەن جانە جاۋاپكەرشىلىكپەن اتقارعان ابزال.
قاجىلىق – بەس پارىزدىڭ ءبىرى. بۇل قۇلشىلىقتىڭ سىرتقى سانىنەن بۇرىن، ىشكى مانىنە ءۇڭىلۋ ماڭىزدى. جان مەن جۇرەك ارقىلى جاسالعان قۇلشىلىق قانا اللانىڭ رازىلىعىنا جەتكىزەدى. ال ماقتان ءۇشىن جاسالعان امال – بوس اۋرەشىلىك.