قاجەت بولعان جاعدايدا قايتادان كارانتين ەنگىزۋگە دايىن بولۋ كەرەك - ددسۇ

الەمدە ۆاكسيناسيانىڭ ورتاشا دەڭگەيى - 60%

دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيسۋس بۇكىل مەملەكەتتەردى حالىقتىڭ كەم دەگەندە 70%-ىن كوروناۆيرۋسقا قارسى ەكپەمەن قامتاماسىز ەتۋگە جانە قاجەت بولعان جاعدايدا سانيتاريالىق شەكتەۋلەردى قايتا ەنگىزۋگە دايىن بولۋعا شاقىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ددسۇ مالىمەتىنشە، ءقازىر 70% كورسەتكىشكە تەك 57 مەملەكەت قول جەتكىزدى، الەمدە ۆاكسيناسيانىڭ ورتاشا دەڭگەيى - 60%. 

«بارلىق ايماقتاردا ورنالاسقان 70-كە جۋىق ەلدە COVID-19 جۇقتىرۋ جاعدايلارى تۋرالى حابارلامالار سانىنىڭ ءوسۋى بايقالدى جانە بۇل الەمدە تەستىلەۋ كۇرت تومەندەگەن كەزدە ورىن الادى»، - دەدى ددۇ باسشىسى. 

گەبرەيسۋس الەمدە كوروناۆيرۋستىڭ تارالۋ جولى مەن قارقىنىن بولجاۋ مۇمكىن ەمەس ەكەنىن اتاپ ءوتتى. 100% ۆاكسيناسيالانۋعا ءتيىس ەڭ وسال توپتار — مەديسينا ماماندارى، 60 جاستان اسقان ادامدار جانە دەنساۋلىق جاعدايى ناشار ادامدار. 31 مامىردا الەمدە COVID-19 كوروناۆيرۋسىن جۇقتىرۋدىڭ 532 210 230 جاعدايى تىركەلدى. سوڭعى تاۋلىكتە جۇقتىرعاندار سانى 387 804 ادامعا ءوستى. الەمدە كوروناۆيرۋس ينفەكسياسىنان قايتىس بولعانداردىڭ جالپى سانى - 6 312 017 ادام. سونىمەن قاتار بۇگىندە 691 ءولىم تىركەلدى. ۆيرۋستان تولىق ەمدەلگەندەر سانى: 503 169 548 ادام.