بۇل سالىقتاندىرۋعا جاتپايدى.
قارجى مينيسترلىگىنىڭ جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى وسى سۇراققا جاۋاپ بەردى، دەپ حابارلايدى aqshamnews.kz
«ساداقا، قايىرىمدىلىق، ەمدىك شارالارعا راسىندا دا، ءموبيلدى اۋدارىمدار ارقىلى قاراجات جيناپ جاتادى. بۇل كاسىپكەرلىك ماقساتتا جينالىپ جاتقان قاراجات ەمەس. ياعني، ول سالىقتاندىرۋعا جاتپايدى. ءبىز جوعارىدا ايتتىق – تەك كاسىپكەرلىك ماقساتقا پايدالانعاندار باقىلانادى. ەگەر ەمدىك شارالارعا قاراجات جيناسا، تيىسىنشە ەمدىك قۇجاتتار بولادى. حابارلاما جولدانۋى مۇمكىن، جولدانسا دالەل قۇجاتتار ارقىلى ول ازامات تۇسىنىكتەمە بەرەدى»، – دەيدى ول.
Kaspi بانكتە ۇيالى تەلەفون ءنومىرى تىركەلگەن ازاماتتاردىڭ اۋدارىمدارىن باقىلاۋ ماسەلەسى ءالى دە كوپ تالقىعا ءتۇسىپ جاتىر. مەملەكەتتىك كىرىستەر كوميتەتىنىڭ وكىلى اۋدارىم سومالارى ەمەس، تەك قاتارىنان 3 اي بويى 100-دەن استام ادامنان اۋدارىم قابىلداعان جەكە تۇلعالار باقىلاۋعا الىناتىنىن اتاپ ءوتتى. مۇنداي جاعدايدا، اۋدارىم قابىلداعان جەكە تۇلعانىڭ ءجسن-ى مەملەكەتتىك كىرىستەر كوميتەتىنە جىبەرىلەدى، ال تۇلعانىڭ وزىنە كامەرالدىق باقىلاۋ جۇرگىزۋ تۋرالى حابارلاما جولدانادى. ول نە سەبەپتى وسىنشاما اۋدارىم العانىن ءتۇسىندىرۋى كەرەك. بۇل تالاپتى ورىنداۋعا 30 جۇمىس كۇنى بەرىلەدى. ەگەر ادام بۇل حابارلاماعا جاۋاپ بەرمەسە، ونىڭ شىعىس وپەراسيالارى ۋاقىتشا توقتاتىلادى.