تۇرعىن ءۇي قۇرىلىس جيناقتارى سالاسىندا ماماندانعان وتباسى بانك، قازاقستان قۇرىلىسشىلار وداعى جانە يسلام قارجىسى مەن بيزنەسىنىڭ قاۋىمداستىعى (AIFB) يسلامدىق قارجى يندۋسترياسىن دامىتۋ تۋرالى مەموراندۋمعا قول قويدى. كەلىسىمنىڭ ماقساتى – شاريعات قاعيداتتارىنا نەگىزدەلگەن يسلامدىق قارجى قۇرالدارىن، سونىڭ ىشىندە يپوتەكانى ەنگىزۋ، دەپ حابارلايدى aqshamnews.kz
ىنتىماقتاستىق اياسىندا زاڭنامانى زەرتتەۋ جانە ونى قازاقستان رەسپۋبليكاسىندا يسلامدىق يپوتەكانى ىسكە قوسۋ ءۇشىن وزگەرتۋ مۇمكىندىكتەرى قاراستىرىلماق. سونىمەن قاتار، وقىتۋ سەمينارلارى مەن زەرتتەۋ جۇمىستارىن جۇرگىزۋ جوسپارلانۋدا. 2025 جىلدىڭ وزىندە-اق كليەنتتەرگە ءۇيدى پايىزسىز ساتىپ الۋ مۇمكىندىگىن بەرەتىن مەحانيزم جاسالادى، بۇل شاريعات تالاپتارىنا سايكەس كەلەدى.
وتباسى بانك سونداي-اق مالايزيالىق CSQlaw Kazakhstan Branch كومپانياسىنىڭ فيليالىمەن كەلىسىمگە قول قويدى. بۇل كومپانيا بانك قىزمەتكەرلەرىن يسلامدىق قارجىلاندىرۋ جانە قارجىلىق قۇقىق نەگىزدەرىنە وقىتۋمەن اينالىسادى. بۇل بولاشاقتا وسى سەگمەنتتە ساپالى قىزمەت كورسەتۋدى قامتاماسىز ەتۋگە مۇمكىندىك بەرەدى.
بۇل باستاما ءدىني قاعيداتتاردى ۇستاناتىن ازاماتتارعا تۇرعىن ءۇي ماسەلەسىن شەشۋگە جول اشادى.
ايتا كەتەيىك، قازىرگى تاڭدا قازاقستاندا ەكى يسلامدىق بانك جۇمىس ىستەيدى:
ADCB يسلام بانكى (تەك بيزنەسكە قىزمەت كورسەتەدى).
زامان-بانك يسلام بانكى (جەكە تۇلعالارعا تەك «ۆاكالا» ءونىمىن، ياعني دەپوزيتتىڭ انالوگىن ۇسىنادى).
سونداي-اق مەملەكەتتىك سەكتوردا دا كرەديتكە ۇقساس، ءبىراق يسلامدىق قارجىلاندىرۋ قاعيداتتارىنا نەگىزدەلگەن ونىمدەر بار. مىسالى، «دامۋ» قورى شاعىن جانە ورتا كاسىپكەرلىك سۋبەكتىلەرىن يسلامدىق قارجىلاندىرۋ قاعيدالارى بويىنشا قولداۋدى ۇسىنادى.