ۇرلانعان 1 134 مال زاڭدى يەلەرىنە قايتارىلدى.
ىشكى ىستەر مينيسترلىگى جىل باسىنان بەرى 190-عا جۋىق مال ۇرىسى ۇستالعانى تۋرالى مالىمدەدى، دەپ حابارلايدى aqshamnews.kz Polisia.kz سايتىنا سىلتەمە جاساپ.
سوڭعى بەس جىلدا قازاقستاندا مال ۇرلىعىنىڭ سانى 64%-عا ازايدى. الماتى وبلىسىندا كريمينالدىق پوليسيا قىزمەتكەرلەرى جايىلىمدا جۇرگەن ءىرى قارا مالدى ۇرلاعان ءۇش ادامنان قۇرالعان قىلمىستىق توپتى ۇستادى. بۇگىندە اتالعان توپتىڭ جەرگىلىكتى تۇرعىندارعا تيەسىلى 30-دان استام سيىردى ۇرلاعانى دالەلدەندى. بەلگىلى بولعانداي، ۇستالعانداردىڭ ءبىرى Volkswagen جۇك كولىگىنىڭ جۇرگىزۋشىسى بولىپ جۇمىس ىستەگەن. كۇدىكتىلەر ءار ەكى-ۇش كۇن سايىن مال ۇرلاپ، ونى سويىپ، ەتىن الماتى قالاسىنىڭ بازارلارىندا ساتقان.
پاۆلودار وبلىسىندا دا پوليسيا قىزمەتكەرلەرى ءۇش ادامنان تۇراتىن قىلمىستىق توپتى ۇستادى. ولار 2023 جىلعى جەلتوقساننان باستاپ بۇگىنگە دەيىن ەكىباستۇز اۋدانى اۋماعىندا جىلقىلاردى ۇرلاعان. تەرگەۋ بارىسىندا كۇدىكتىلەردىڭ ءبىرى اۋىل شارۋاشىلىعى سەرىكتەستىگىندە جىلقىشى بولىپ جۇمىس ىستەپ، سوڭعى ەكى جىل ىشىندە 70-تەن استام جىلقىنى ۇرلاعانى انىقتالدى.
مال ۇرلىعىمەن كۇرەس – پوليسيا قىزمەتىنىڭ باسىم باعىتتارىنىڭ ءبىرى. قابىلدانعان شارالاردىڭ ناتيجەسىندە، سوڭعى بەس جىلدا مال ۇرلىعى قىلمىستارىنىڭ سانى 64%-عا ازايعان. جىل باسىنان بەرى 188 مال ۇرلىعى فاكتىسى بويىنشا قىلمىسكەرلەر ۇستالىپ، 41 قىلمىستىق توپتىڭ ارەكەتى توقتاتىلدى. ۇرلانعان 1 134 مال باسى زاڭدى يەلەرىنە قايتارىلدى.
ىشكى ىستەر مينيسترلىگى قاراپايىم قاۋىپسىزدىك ەرەجەلەرىن ساقتاۋدى ۇسىنادى:
قورالاردى بەكىتىپ، مالدى قاراۋسىز قالدىرماۋ كەرەك؛
اسىلتۇقىمدى مالدى باقىلاۋعا الۋ ماقساتىندا GPS-ترەكەرلەردى ورناتۋ سياقتى زاماناۋي تاسىلدەردى كەڭىنەن قولدانۋ قاجەت؛
مالدى ۇنەمى ەسەپكە الىپ وتىرۋ، چيپتەۋ، سىرعالاۋ جانە ەن سالۋ كەرەك.