وقۋ جىلى اياقتالعاننان كەيىن الماتىدا مەكتەپ جانىنداعى لاگەرلەر جۇمىسىن باستايدى. قازىرگى ۋاقىتتا مەگاپوليستەگى 200-دەن استام مەكتەپ ولاردى اشۋعا بەلسەندى دايىندىق جۇرگىزىپ جاتىر. اتا-انالار بالاسىن لاگەرگە مەكتەپ اكىمشىلىگىنە جۇگىنۋ ارقىلى تىركەي الادى. لاگەرلەرگە بارۋ تولىقتاي تەگىن، دەپ حابارلايدى aqshamnews.kz
بالالار ءۇشىن مازمۇندى جازعى دەمالىس باعدارلاماسى ازىرلەنىپ جاتىر. لاگەرلەردە بالالار زياتكەرلىك جانە شىعارماشىلىق ويىندارعا، سپورتتىق جارىستارعا، ۆيكتورينالارعا، پىكىرسايىس كلۋبتارىنا، جازعى ءتىل مەكتەپتەرى مەن «جاس ۇلان»، «جاس قىران» باعدارلامالارى بويىنشا ساباقتارعا قاتىسا الادى. لاگەرلەر جاز مەزگىلىندە جۇمىس ىستەيدى. ناقتى جۇمىس كەستەسىن مەكتەپ اكىمشىلىگىنەن ناقتىلاۋ قاجەت.
«ءار مەكتەپ جازعى باعدارلاماسىن ازىرلەيدى. مىسالى، التى مەكتەپ جانىنان ۇلتتىق داستۇرمەن جاقىن تانىسۋعا، ساندىك-قولدانبالى ونەر مەن قولونەر نەگىزدەرىن ۇيرەنۋگە مۇمكىندىك بەرەتىن كيىز ۇيدەگى ەتنولاگەر ۇيىمداستىرىلادى. 24 مەكتەپتە فۋتبول، ۆولەيبول، باسكەتبول جانە ۇلتتىق سپورت تۇرلەرى بويىنشا جارىستار وتەدى. 50 مەكتەپتە وقۋشىلاردىڭ ەكولوگيالىق مادەنيەتىن جانە تابيعاتقا سانالى كوزقاراسىن دامىتۋعا باعىتتالعان ەكولوگيالىق لاگەر جۇمىس ىستەيدى. جالپى، 200-دەن استام مەكتەپ بازاسىندا جازعى مەكتەپ جانىنداعى لاگەر ۇيىمداستىرىلادى. اتا-انالار لاگەرگە بارۋ ءۇشىن اقى تولەمەيدى»، – دەدى الماتى قالاسى ءبىلىم باسقارماسىنىڭ باسشىسى سايران سايفەدەنوۆ.
سايران سايفەدەنوۆ بالالاردىڭ قاۋىپسىزدىگى ماسەلەسىنە ەرەكشە كوڭىل بولىنەتىنىن دە اتاپ ءوتتى. بارلىق لاگەر مەديسينالىق كابينەتتەرمەن جابدىقتالادى. مەكتەپ ديرەكتورلارىمەن سانيتارلىق-ەپيدەميولوگيالىق باقىلاۋ باسقارماسى جانە توتەنشە جاعدايلار دەپارتامەنتى وكىلدەرىنىڭ قاتىسۋىمەن جينالىستار وتكىزىلدى. سونىمەن قاتار، بالالار ءۇشىن سۋ ايدىنىندا، جولدا، ساياباقتا جانە قوعامدىق ورىندا ءوزىن ۇستاۋ ەرەجەلەرى بويىنشا الدىن الۋ ساباقتارى ۇيىمداستىرىلادى.
بۇعان قوسا، جاز مەزگىلىندە قالادا كوشپەلى جانە بەيىندى لاگەر دە ۇيىمداستىرىلادى. «شابىت» جانە «سامعاۋ» ورتالىقتارى، №1 وقۋشىلار ءۇيى جانە ەكى يننوۆاسيالىق شىعارماشىلىق ورتالىعى سەكىلدى بەس قوسىمشا ءبىلىم بەرۋ مەكەمەسىنىڭ بازاسىندا عىلىمعا، ەكسپەريمەنتتەرگە جانە جوبالىق قىزمەتكە باعىتتالعان IT-لاگەر جۇمىسىن باستايدى. وقۋشىلار سارايى جانە باسقا مەكەمەلەر جانىنداعى كۇندىزگى لاگەردە شاحمات، ۆوكال، بي، كۇرەس جانە باسقا دا باعىتتار بويىنشا ساباقتار وتكىزىلەدى.
جازعى لاگەرلەردەن بولەك، جاز بويى بالالارعا قوسىمشا ءبىلىم بەرەتىن ۇيىمدار دا جۇمىس ىستەيدى. مەملەكەتتىك ءبىلىم بەرۋ تاپسىرىسى اياسىندا 11 مىڭعا جۋىق وقۋشى 122 جەكە مەنشىك ءبىلىم بەرۋ ۇيىمىندا ساباققا تەگىن قاتىسادى.
سونداي-اق، قالالىق كوللەدجدەر بازاسىندا كاسىپتىك باعدار بەرۋ باعىتىنداعى سەكسيالار ۇيىمداستىرىلادى. «جاز – بولاشاق ماماندىقپەن» جوباسى اياسىندا وقۋشىلار 17 كوللەدج بازاسىندا اسپازدىق، كيىم ديزاينى، شاشتاراز ءىسى جانە باسقا دا ماماندىق بويىنشا ءوزىن سىناپ كورە الادى.