يندونەزيادا وتكەن «Gamma World MMA Championship 2024» الەم چەمپيوناتىندا پوليسەي ارۋ الەم چەمپيونى اتاندى
10-14 جەلتوقسان كۇندەرى يندونەزيا استاناسى دجاكارتا قالاسىندا ەرەسەكتەر اراسىندا وتكەن «Gamma World MMA Championship 2024» الەم چەمپيوناتى اياقتالدى، دەپ حابارلايدى aqshamnews.kz Polisia.kz-كە سىلتەمە جاساپ.
الەمنىڭ 66 ەلىنەن كەلگەن 920 سپورتشى قاتىسقان بۇل ءدۇبىرلى دودادا اتىراۋ وبلىسى پوليسيا دەپارتامەنتىنىڭ قىزمەتكەرى ايدا حايرۋللينا قازاقستان نامىسىن ابىرويمەن قورعاپ، الەم چەمپيونى اتاندى. 72،6 كەلى سالماق دارەجەسىندە سىنعا تۇسكەن ايدا ءۇش كەزدەسۋىن دە سەنىمدى جەڭىسپەن اياقتادى. العاشقى كەزەڭدەردە كامبودجا مەن اۆستراليا سپورتشىلارىن ايقىن باسىمدىقپەن جەڭسە، فينالدا ەگيپەت وكىلىمەن وتكەن تارتىستى جەكپە-جەكتە ءوزىنىڭ شەبەرلىگى مەن فيزيكالىق دايىندىعىنىڭ جوعارى دەڭگەيىن كورسەتىپ، التىن مەدال يەگەرى اتاندى.
– جاۋاپكەرشىلىك پەن تاباندىلىقتى تالاپ ەتەتىن قىزمەتىممەن قاتار، سپورتتا دا وسىنداي جەتىستىككە جەتۋىم – جاتتىقتىرۋشىلارىمنىڭ، ارىپتەستەرىمنىڭ، وتباسىمنىڭ جانە ەلىمنىڭ زور قولداۋىنىڭ ناتيجەسى. بۇل التىن مەدال – تەك مەنىڭ عانا ەمەس، بۇكىل قازاقستاننىڭ جەڭىسى. الداعى ۋاقىتتا دا ەلىمنىڭ ابىرويىن قورعاۋعا بار كۇش-جىگەرىمدى سالامىن، – دەدى ايدا حايرۋللينا جەڭىسىنەن كەيىنگى سوزىندە.
ايدا حايرۋللينانىڭ جەڭىسى – قازاقستاننىڭ سپورتتاعى تاعى ءبىر ماقتانىشى عانا ەمەس، سونداي-اق جاۋاپتى قىزمەت پەن سپورتتى قاتار الىپ ءجۇرىپ، بيىك بەلەستەرگە جەتۋگە بولاتىنىن دالەلدەگەن جارقىن ۇلگى. ەلىمىزدىڭ تۋىن كوكتە جەلبىرەتىپ، قازاقستاننىڭ ابىرويىن اسقاقتاتقان جەڭىمپازعا الداعى ۋاقىتتا دا تولاعاي تابىستار تىلەيمىز!