4 قىركۇيەكتەن باستاپ ەلىمىزدىڭ بارلىق كينوتەاترلارىندا «Dala Cinema» كينوستۋدياسى ۇسىنعان الەۋمەتتىك-دراما جانرىنداعى Qaitadan ءفيلمى جارىققا شىقتى.
بۇل فيلم كورەرمەنگە گولليۆۋدتىق «ۋاقىت ىلمەگى» (day loop) ءموتيۆىن قازاقى بولمىس جانە وزەكتى الەۋمەتتىك ماسەلەلەرمەن ءساتتى ۇيلەستىرگەن بىرەگەي تۋىندى، دەپ حابارلايدى aqshamnews.kz.
ءفيلمنىڭ وقيعاسى اۋىل توڭىرەگىندەگى دامبىنىڭ جارىلۋىنا بايلانىستى ءوربيدى. دامبىداعى ۇلكەن سىزات – بۇكىل قازاق قوعامىنا ارنالعان سيمۆولدىق ەسكەرتۋ ىسپەتتەس. ول كەز كەلگەن ۇساق-تۇيەكتىڭ قاۋىپسىزدىك پەن جاۋاپكەرشىلىك تۇرعىسىنان ماڭىزدى ەكەنىن جەتكىزەدى. «قايتادان» تۋىندىسى – قوعامدى توتەنشە جاعدايلارعا نەمقۇرايلى قاراماۋعا، ەسكەرتۋ سيگنالدارىنا دەر كەزىندە ءۇن قاتىپ، بىرلىكپەن ارەكەت ەتۋگە شاقىرادى. باس كەيىپكەر – قالا بالاسى راۋان. ول ۇبت-دان ءسۇرىنگەن سوڭ، اتا-اناناسى ساباق بولسىن دەپ شالعايداعى اۋىلعا اپارىپ تاستايدى. ءبىراق تاعدىر ونى كۇتپەگەن سىناققا سالادى: راۋان ءبىر كۇننىڭ تۇزاعىنا قالادى. ءار كۇننىڭ سوڭىندا دامبى قيراپ، اپات بولادى. كەيىپكەر ۋاقىت ىلمەگىنەن شىعۋ ءۇشىن تەك ءوزىن عانا ەمەس، بۇكىل اۋىلدى قۇتقارۋى كەرەك ەكەنىن تۇسىنەدى.
«ءفيلمنىڭ يدەياسى ماعان 2020 جىلى كەلدى. سول جىلى الماتى وبلىسىنداعى كۇرتى اۋىلىندا ءبىر تۇسىرىلىمدە جۇرگەنبىز. سول اۋىلدىڭ شەتىندە ۇلكەن دامبىنى كورىپ، «ەگەر جارىلىپ كەتەر بولسا، اۋىلدىڭ تۇگى قالمايدى عوي» دەگەن وي كەلدى. اقىرى وسى يدەيانى دامىتا كەلە، «قايتاداننىڭ» سەنارييىن جازىپ شىقتىق»، - دەيدى فيلم رەجيسسەرى جانە سەناريي اۆتورى دۋمان ەركىمبەك.
ونىڭ ايتۋىنشا، فيلمدە ادامداردىڭ باسىنا تۇسكەن سىناق، تىعىرىقتان شىعۋ كەزىندەگى ارەكەتتەر، وي سالاتىن يدەيا بار. كوركەم تۋىندىدا وسىنداي ايتپاي كەلەتىن اپاتتاردىڭ الدىن الۋ، وقيعانى بولدىرماۋ، سەبەبى مەن سالدارى سىندى باعىتتار قامتىلعان.
«اپات ايتىپ كەلمەيدى. وسى فيلم ارقىلى قانداي دا ءبىر توسىن جاعداي بولسا، ەلىمىزدىڭ ءاربىر ازاماتى قالاي ارەكەت ەتۋ كەرەگىن كورسەتۋگە تىرىستىق. جالپاق تىلمەن ايتار بولساق، بۇل – ەسەيۋ تۋرالى فيلم. فيلم ءۇشىن جاي عانا دەكوراسيا ەمەس، تولىققاندى اۋىل تۇرعىزىلدى. وعان قويۋشى سۋرەتشىلەرىمىز باس-اياعى 3 اي ۋاقىت جوعالتتى. وسى ارقىلى ءبىزدىڭ مامانداردىڭ اۋقىمدى عانا ەمەس، وتە كرەاتيۆتى دەكوراسيالاردى دا جاساي الاتىن دالەلدەدىك دەپ ويلايمىن. 300-دەن استام ماسسوۆكا، ونداعان درون، ەكى ۇلكەن ءتۇسىرىلىم توبى قاتىسقان ەۆاكۋاسيا مەن دامبىنىڭ جارىلۋ ساحنالارىن ءتۇسىرۋ قيىنعا سوقتى. جالپى، وتە ماسشتابتى، تەحنيكالىق تۇرعىدان قيىن جوبا بولعاندىقتان، ءاربىر ءتۇسىرىلىم كۇنى سىناققا تولى بولدى. البەتتە، بۇل جۇمىستاردى اتقارۋ وڭاي بولعان جوق. دەگەنمەن جۇمىس توبىنىڭ جوباعا دەگەن سەنىمى مەن اۋىزبىرشىلىگىنىڭ ارقاسىندا ءبارىن وتكەردىك. ەڭ باستىسى – كورەرمەنگە ساپالى، وي سالارلىق تەرەڭ تۋىندى ۇسىنعىمىز كەلدى. قالعانىن حالىق باعالايدى»، - دەپ قورىتىندىلادى ءفيلمنىڭ باس پروديۋسەرى جالىن تىلەۋبەرگەن.
فيلم مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ كومەگىمەن ءتۇسىرىلدى. باس رولدەردە وتاندىق جاس اكتەرلەر جاسۇلان كوپبەرگەن، ەرمەك شىنبولاتوۆ جانە شۇعىلا ەشەنوۆا تۇسكەن. ەكىنشى پلاندا المات ساقاتوۆتى، ەرجان نۇرىمبەتوۆتى جانە ءاشىم احمەتوۆتى كورۋگە بولادى.
«قايتادان» – تەك ۋاقىت ىلمەگىنىڭ سيمۆولى عانا ەمەس، ءوز بولاشاعى مەن قوعام يگىلىگى ءۇشىن كۇرەس جولىن قايتا ويلانۋعا شاقىراتىن فيلم.
