ويىننىڭ قورىتىندىسى بويىنشا ءبىرىنشى ورىندى ماڭعىستاۋ وبلىسىنىڭ وقۋشىلارى يەلەندى
جاسوسپىرىمدەردىڭ بويىنداعى جاۋىنگەرلىك رۋحتى سىنعا سالاتىن «Qaisar» اسكەري-پاتريوتتىق ويىندارى ءوز مارەسىنە جەتتى، دەپ حابارلايدى Almaty-akshamy.kz.
ەلدىڭ تۇكپىر-تۇكپىرىنەن 1700-گە جۋىق جوعارى سىنىپ وقۋشىسى قاتىسقان سايىستىڭ اقتىق سىنىنا نەبارى 100 بالا ءوتىپتى. ولار ەكى كۇن بويى ءجۇزۋ مەن كەدەرگىلەردەن ءوتۋ بويىنشا سىنعا ءتۇستى. سونداي-اق «مەنىڭ ەلىم قازاقستان» تاقىرىبىندا اسكەري-تاريحي ۆيكتوريناعا قاتىستى. ويىننىڭ قورىتىندىسى بويىنشا ءبىرىنشى ورىندى ماڭعىستاۋ، ەكىنشى ورىندى قاراعاندى وبلىسىنىڭ وقۋشىلارى جەڭىپ الدى. ال ءۇشىنشى ورىن شىعىس قازاقستان وبلىسىنىڭ كومانداسىنا بۇيىردى.
«Qaisar» اسكەري-پاتريوتتىق پارتيالىق جوباسىنىڭ نەگىزگى ماقساتى – جاستاردىڭ بويىندا قازاقستاندىق ءپاتريوتيزمدى دامىتۋ. وسى 2 اپتانىڭ كولەمىندە جوبانىڭ اياسىندا قازاقستاننىڭ بارلىق ايماقتارىندا جاستار بەلسەنە قاتىستى. ناقتى جوسپارىمىز بار. جىل سوڭىنا دەيىن قايسار اسكەري پاتريوتتىق جوباسىنىڭ اياسىندا 25 مىڭ جاستاردى قامتيمىز دەگەن جوسپارىمىز بار»، – دەدى Amanat پارتياسىنىڭ اتقارۋشى حاتشىسى اسحات ورالوۆ.