قازاقستاننىڭ بەدەلىنە الەمدىك سپورت قوعامداستىعىنىڭ الدىندا نۇقسان كەلتىردى
مادەنيەت جانە سپورت مينيسترلىگى ۇلتتىق قۇرامانىڭ سۋردليمپياداداعى ويىنىنا قاتىستى رەسمي مالىمدەمە جاسادى، دەپ حابارلايدى Almaty-akshamy.kz.
ەسكە سالا كەتەيىك، كەشە برازيليادا ءوتىپ جاتقان سۋردليمپيادا ويىندارىندا سپورتشى ەركەبۇلان قانافين جەڭىپ العان التىن مەدالگە قاتىستى داۋ تۋىنداعان بولاتىن.
«دزيۋدوشى ەركەبۇلان قانافين سۋردليمپيادادان ءبىرىنشى التىن مەدالدى جەڭىپ الدى. ال ءبىزدىڭ سپورت كوميتەتى بۇل جايىندا حابار تاراتقان دا جوق. سوراقىسى بۇل ەمەس. قۇراما باپكەرىنىڭ ايتۋىنشا، حالىقارالىق تورەشىلەر جەڭىستى مويىنداعانىنا قاراماستان، سپورت كوميتەتى ءوز قۇراماسىنىڭ مەدالىنە نارازىلىق تانىتقان»، - دەلىنگەن قازاقستان سپورتشىلار وداعى ب ا ق وكىلدەرىنە تاراتقان مالىمدەمەدە.
وسىعان بايلانىستى مادەنيەت جانە سپورت مينيسترلىگى جازعى سۋردليمپياداعا ۇلتتىق قۇراما كوماندادان 59 سپورتشى قاتىسىپ جاتقانىن ايتتى.
«الايدا سۋردليمپيادا كوميتەتى قازاقستان زاڭناماسىنا قاراماستان، ءوز تاراپىنان ءبىرقاتار سپورتشىلاردى، ونىڭ ىشىندە ەركەبۇلان ءقانافيندى جارىسقا اپارعان. قانافين بۇرىن-سوڭدى ەستۋ قابىلەتى بۇزىلعان سپورتشىلار اراسىنداعى رەسمي جارىستارعا قاتىسپاعان. قازاقستان رەسپۋبليكاسى ۇلتتىق قۇراما كومانداسىنىڭ مۇشەسى ەمەس جانە دەنە مۇمكىندىكتەرى شەكتەۋلى جاندارعا ارنالعان سپورت ۇيىمدارىندا تىركەلمەگەن. ق ر مادەنيەت جانە سپورت مينيسترلىگىندە اۋديوگرامما ناتيجەلەرى جانە جالپى سپورتشىنىڭ دەنساۋلىق جاعدايى تۋرالى اقپارات جوق. وسىعان قاراماستان، ۇلتتىق سۋردليمپيادا كوميتەتى ە.ءقانافيندى ءوز ەسەبىنەن جارىسقا جىبەرىپ، قازاقستاننىڭ بەدەلىنە الەمدىك سپورت قوعامداستىعىنىڭ الدىندا نۇقسان كەلتىردى جانە سپورتتىق ەتيكالىق قاعيدالاردى بۇزدى»،- دەپ ءمالىم ەتتى ۆەدومستۆو.
بۇل رەتتە مادەنيەت جانە سپورت مينيسترلىگى ۇلتتىق قۇراما كوماندانىڭ ءتىزىمىن جاساۋ كەزىندە 81 كەلىگە دەيىنگى سالماق دارەجەسىندە سۋردو دزيۋدودان قازاقستان چەمپيوناتىنىڭ قورىتىندىسى بويىنشا ەل چەمپيونى ايدوس تۇگەلبايەۆتى ەنگىزگەن بولاتىن.
مينيسترلىك ۇلتتىق سۋردليمپيادا كوميتەتىنىڭ ۇستىنەن ارنايى سوت ورگاندارىنا شاعىم تۇسىرەتىنىن رەسمي تۇردە مالىمدەدى.