"قايراتتىڭ" باس جاتتىقتىرۋشىسى كلۋبتان نەگە كەتتى؟

الەكساندر كەرجاكوۆ كلۋبتان كەتۋ سەبەبىن ءتۇسىندىردى، دەپ حابارلايدى aqshamnews.kz Prosports.kz -كە cىلتەمە جاساپ. 

بەلگىلى بولعانداي، رەسەيلىك باپكەرلىك قىزمەتتەن ءوز ەركىمەن باس تارتقان. الەكساندر كەرجاكوۆ بۇل شەشىمىنە بايلانىستى پىكىرىن دە ءبىلدىردى. رەسەيلىك جاتتىقتىرۋشىنىڭ ايتۋىنشا، كلۋبتان كەتۋىنە ءبىر جاعدايلار تۇرتكى بولعان كورىنەدى.

«كەشە تاڭەرتەڭ قىزمەتىمنەن كەتۋ تۋرالى ءوتىنىش جازدىم. مەن ءۇشىن بۇل شەشىم وڭاي بولعان جوق، سەبەبى ءالى دە وسى جەردە جۇمىس ىستەي بەرگىم كەلدى. ءبىز ويىن ورنەگى تۇرعىسىنان ايتارلىقتاي جەتىستىكتەرگە جەتتىك، ءتاۋىر ناتيجەلەر كورسەتكەن بولاتىنبىز.بىزبەن بىرگە «قايرات» ءبىراز ۋاقىتتان بەرى قولى جەتپەي جۇرگەن تۋرنيرلىك كەستەدەگى كوشباسشىلىق ورىنعا كوتەرىلدى. كلۋب بىرىنشىلىك سوڭىنا دەيىن 6 تۋر قالعاندا چەمپيوندىققا باستى ۇمىتكەر قاتارىنان سانالادى. الايدا، باس باپكەر رەتىندە جۇمىس بارىسىندا كوز جۇمىپ قاراۋعا بولمايدى دەپ ەسەپتەيتىن جاعدايلار بولادى. ولاردىڭ ءمان-جايىن ايتپايمىن، كلۋبتىڭ ءوز ىشىندە قالسىن. كوماندا مەن فۋتبولشىلارعا جەڭىس پەن ساتتىلىك تىلەيمىن»، - دەدى ا.كەرجاكوۆ.

ايتا كەتەيىك، «قايرات» ءدال ءقازىر ىشكى بىرىنشىلىكتە 32 ۇپايمەن كوش باستاپ تۇر. رەسەيلىك باپكەر الماتىلىق كوماندانى مامىردىڭ اياعىندا تىزگىندەگەن ەدى. وسى ارالىقتا كەرجاكوۆتىڭ كلۋبى قپل اياسىندا 9 ماچ وتكىزىپ، 5 رەت جەڭىسكە جەتتى. سونداي-اق، 2 كەزدەسۋدە قارسىلاستارىمەن ۇپاي ءبولىسىپ، تاعى ەكى باسەكەدە جەڭىلىس تاپتى.