مەملەكەت باسشىسىنىڭ باستاماسىمەن جۇزەگە اسقان «ءبىلىم بەرۋدەگى وزگەرىستەردىڭ مىڭ كوشباسشىسى» جوباسى ءساتتى جالعاسۋدا.
بۇگىنگى تاڭدا ىرىكتەۋ مەن دايىندىقتىڭ بارلىق كەزەڭىنەن وتكەن 136 قاتىسۋشى ديرەكتور بولىپ تاعايىندالدى. ونىڭ ىشىندە 20 ديرەكتور جايلى مەكتەپتەردى باسقارادى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
بيىلعى جىلى جوبانىڭ ەكىنشى كەزەڭى جۇزەگە اسۋدا. جىل باسىنان بەرى مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىندا ەڭبەك ەتەتىن پەداگوگتەردەن 13 796 ءوتىنىم قابىلدانعان. تەستىلەۋ ناتيجەسى بويىنشا كەلەسى كەزەڭگە 900-گە جۋىق ۇمىتكەر ءوتتى. ولار پەداگوگيكالىق شەبەرلىك ورتالىعىندا «وزگەرىس كوشباسشىلارى: زاماناۋي ءبىلىم بەرۋ ۇيىمىن باسقارۋعا جاڭا كوزقاراس» تاقىبىرى اياسىندا وقىتۋدان وتۋدە. ءارى قاراي اڭگىمەلەسۋ تۇرىندە ىرىكتەۋدىڭ سوڭعى كەزەڭى ۇيىمداستىرىلادى. ىرىكتەۋدىڭ بارلىق 5 كەزەڭىنەن وتكەن قاتىسۋشىلار رەسپۋبليكالىق كادر رەزەرۆىنە الىنادى.
«وقۋدان، تاعىلىمدامادان جانە اڭگىمەلەسۋدەن وتكەن ۇمىتكەرلەرگە سەرتيفيكات بەرىلەدى. سونىڭ نەگىزىندە ودان ءارى جۇمىسقا ورنالاسۋ ءۇشىن ولار كادر رەزەرۆىنە ەنگىزىلەدى. رەزەرۆتەگىلەر ءبىرىنشى باسشىنىڭ بوس لاۋازىمىنا كونكۋرستىق راسىمدەردەن وتپەي تاعايىندالادى. اتاپ وتەيىك، بارلىق كەزەڭدەردەن ءساتتى ءوتىپ، سەرتيفيكات العاندارعا «باسشى-كوشباسشى» بىلىكتىلىك ساناتى بەرىلەدى»، - دەپ اتاپ ءوتتى ورتا ءبىلىم كوميتەتىنىڭ ءتوراعاسى قانىبەك جۇماشيەۆ.
ەسكە سالايىق، ق ر وقۋ-اعارتۋ مينيسترلىگى مەملەكەت باسشىسىنىڭ تاپسىرماسىمەن 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسىمەن ءبىلىم بەرۋدەگى وزگەرىستەردىڭ كوشباسشىلارىن ىرىكتەۋ جانە دايارلاۋ جونىندەگى جوبانى ىسكە اسىرۋدا. ۇمىتكەرلەر 8 اي بويى قۇزىرەتتىلىكتى باعالاۋ، ءۇش دەڭگەيلى وقىتۋ، ەلىمىزدىڭ جەتەكشى مەكتەپتەرىندە تاعىلىمدامادان ءوتۋ، قورىتىندى باعالاۋ جانە مينيسترلىك جانىنداعى كوميسسيامەن اڭگىمەلەسۋدەن وتەدى. رەزەرۆكە قابىلدانعان جاڭا بۋىن باسشىلارى كادر ماسەلەسىن شەشۋگە ءوز ۇلەسىن قوسادى، سونىمەن قاتار جاڭا مەكتەپتەردى، ونىڭ ىشىندە «جايلى مەكتەپ» ۇلتتىق جوباسى اياسىندا سالىنىپ جاتقان مەكتەپتەردى دە باسقارۋعا قۇزىرەتتى بولادى.