جەلىدە تاعى ءبىر تورت داۋى پايدا بولدى. اقتوبەلىك كونديتەر "قايراتقا" فۋتبول كلۋبىنا ارناپ تورت جاسادى. اقتوبەلىك فۋتبول جانكۇيەرلەرى بۇعان نارازىلىعىن تانىتتى، - دەپ حابارلايدى اqshamnews.kz ءتىلشىسى.
اقتوبەلىك كونديتەر سامال اسانوۆا الماتىلىق كوماندانىڭ چەمپيوندار ليگاسىنا شىعۋىنا وراي تورت ءپىسىرىپ، الەۋمەتتىك جەلىدە سىنعا ۇشىرادى.
ول تورت ازىرلەۋ بارىسىن ۆيدەوعا ءتۇسىرىپ جاريالاعان. كەيىن اقتوبەلىك جانكۇيەرلەر وعان بويكوت جاريالادى.
"اقتوبەدە فۋتبول بۇل جاي عانا ويىن ەمەس، ول - اقتوبەلىكتىڭ اجىراماس بولىگى. اقتوبەدەن شىققان كاسىپكەردىڭ مۇنداي ارەكەتى ورىنسىز ءارى لايىقسىز دەپ سانايمىز. ءبىز ءوز ۇستانىمىمىزدى وتكىنشى حايپقا ايىرباستامايمىز!" - دەپ جازعان فۋتبول جانكۇيەرلەرى.
كونديتەر فۋتبولدان حابارى جوعىن، بار بولعانى قازاقستاندىق سپورتشىلاردى قولداعانىن ايتتى.
"جىگىتتەر ۆيدەونى ءوشىردىم. سىزدەرگە فۋتبولدان حابارىم جوعىن، تەك ەلىمىزدەن شىققانعا قولداۋ رەتىندە جاساعانىمدى مىڭ رەت ايتتىم. مەندە ءار ءتۇرلى تاقىرىپتا كونتەنتتەر تۇسىرىلەدى. ەرتەڭ "اقتوبەگە" ارناپ كۇشتى تورت جاسايمىن. ءبىر بولمايتىن دۇنيەدەن ءوز قالامىزدىڭ ماسقاراسىن شىعارمايىقشى جانە مەنى بالاعاتتاۋدىڭ قاجەتى جوق. انا، اپكە، قارىنداستارىڭىز بار شىعار. مەن - جالعىزباستى انامىن، وسى ۇلكەن كاسىپتى نولدەن باستاپ كوتەرىپ، ەڭبەك ەتىپ كەلەمىن. قانشاما ۇيقىسىز تۇندەر ءوتتى؟! تەك اقتوبەنىڭ وزىندە 550 ادام جۇمىس جاسايدى، باسقا قالالاردى قوسپاعاندا. قانشاما جاستاردى قولداعان پروەكتتەرىم بار. مەنىڭ ءبىر اكە، كوكەم جوق. تازا ەڭبەك! بار بولسا ەشقاشان اياعان ەمەسپىن. ادمين وسىندا ۋشىقتىرماي، نەگە جەكەمە جازبادىڭىز، ءتۇسىندىرىپ. كىشكەنە شالىس باسساڭ، ءارى قاراي شالدىرۋدىڭ قاجەتى جوق. جەكەگە دە ەندى عانا جازىپ جاتىر، بارىمشا تۇسىندىرگەندەي بولدىم. بارىڭىزگە ساتتىلىك"، -دەدى كونديتەر.
ەسكە سالايىق، بۇعان دەيىن الەۋمەتتىك جەلىدە كونديتەر مەن بلوگەردىڭ داۋى قىزدى. بلوگەر تۋعان كۇنىنە تاپسىرىس بەرگەن تورتتى كونديتەر 600 مىڭ تەڭگەگە باعالاعان. زاڭگەردىڭ ايتۋىنشا، باعا مەرەكە كۇنى عانا ايتىلعان. الايدا تورت قۇنى ءالى تولەنبەگەن. كونديتەر نۇرشات اقبەرگەنوۆا بلوگەردى سوتقا بەرەتىنىن ايتتى.