كومپانيالار تەمىرجول ءتاريفىن نەگىزسىز كوتەرىپ، قىرۋار پايدا تاپقان.
قايرات ساتىبالدى ۇلىنىڭ باقىلاۋىنداعى ەكى كومپانيانىڭ باسشىسى ۇستالىپ، سوت سانكسياسىمەن قاماۋعا الىندى، دەپ حابارلايدى Almaty-akshamy.kz سىبايلاس جەمقورلىققا قارسى قىزمەت اگەنتتىگىنە سىلتەمە جاساپ.
سىبايلاس جەمقورلىققا قارسى قىزمەت قايرات ساتىبالدىۇلىنا، ونىڭ بۇرىنعى ايەلى گ.ساتىبالدىعا جانە باسقا دا تۇلعالارعا قاتىستى تەرگەۋدى جالعاستىرىپ جاتىر.
«تەرگەۋ ق.ساتىبالدى ۇلىنىڭ باقىلاۋىنداعى كومپانيالار – كىرمە تەمىرجول جەلىلەرى (سوڭعى كيلومەتر) يەلەرىنىڭ اقشا جىمقىرعانىن انىقتادى»، - دەلىنگەن حابارلامادا.
قايرات ساتىبالدى ۇلىنىڭ باقىلاۋىنداعى ەكى كومپانيانىڭ باسشىلارى ۇستالىپ، سوت سانكسياسىمەن قاماۋعا الىندى.
«اتالعان تۇلعالار مەملەكەتتىك ورگانداردىڭ لاۋازىمدى تۇلعالارىنىڭ كومەگىمەن ەلدەگى قالا قۇراۋشى كاسىپورىندارعا كىرەبەرىس جولدارعا قىزمەت كورسەتۋ ءتاريفىن نەگىزسىز جوعارىلاتۋ ارقىلى ميللياردتاعان پايدا تاپقان، بۇل حالىقتىڭ تىرشىلىگىن قامتاماسىز ەتۋ قىزمەتتەرى باعاسىنىڭ وسۋىنە اكەلگەن»، - دەپ اتاپ ءوتتى سىبايلاس جەمقورلىققا قارسى قىزمەت.
كۇدىكتىلەردىڭ كىناسىن سوت انىقتايدى.
تەرگەۋ مۇددەسىنە بايلانىستى باسقا اقپاراتتار جاريا ەتىلمەيدى.