قحا-نىڭ الداعى سەسسياسى 29 ساۋىردە وتەدى.
«ەل بىرلىگى – جاڭارعان قازاقستاننىڭ نەگىزى» تاقىرىبىنداعى اسسامبلەيا سەسسياسىن شاقىرۋ تۋرالى وكىمگە مەملەكەت باسشىسى قول قويدى، دەپ حابارلايدى Almaty-akshamy.kz
«قوعامدىق كەلىسىم» رمم ديرەكتورى عالىمجان قۇسمانعالي قازاقستان حالقى اسسامبلەياسىنىڭ ءحححى سەسسياسىندا قانداي ماسەلەلەر تالقىلاناتىنىن ايتىپ بەردى.
«پرەزيدەنتتىڭ ساياسي وزگەرىستەردى جۇزەگە اسىرۋعا باعىتتالعان جاڭا ساياسي باستامالارى اياسىندا قازاقستان حالقى اسسامبلەياسىنىڭ جانە ونىڭ قوعامدىق قۇرىلىمدارىنىڭ ءرولى مەن ماڭىزىن قاراستىرۋ قاجەت ەكەنى ءسوزسىز. وسى جانە باسقا دا ماسەلەلەر 29 ساۋىردە وتەتىن قحا-نىڭ الداعى سەسسياسىندا تالقىلانادى. پرەزيدەنت «ەل بىرلىگى – جاڭارعان قازاقستاننىڭ نەگىزى» كۇن تارتىبىمەن اسسامبلەيا سەسسياسىن شاقىرۋ تۋرالى وكىمگە قول قويدى»، - دەدى عالىمجان قۇسمانعالي.
سپيكەردىڭ ايتۋىنشا، سەسسيا ەكى كۇنگە جوسپارلانعان. ءبىرىنشى كۇنى ءۇش سەكسيادا پىكىرتالاستار وتەدى – «ۇلت كەلەشەگى جانە قحا-نى جاڭعىرتۋ، «حالىق بىرلىگى؛ ءبىلىمنىڭ، مادەنيەتتىڭ جانە ازاماتتىق قوعام مەن بۇقارالىق مەديا ينستيتۋتتارىنىڭ ءرولى» جانە ءۇشىنشى سەكسيانىڭ تاقىرىبى: «قازاقستان حالقى اسسامبلەياسىنىڭ جاستار سەسسياسى». ەكىنشى كۇنى قحا سەسسياسى پرەزيدەنت قاسىم-جومارت توقايەۆتىڭ توراعالىعىمەن وتەدى.