قايرات ساتىبالدىنىڭ اكتيۆتەرى مەملەكەتكە قايتارىلدى

بۇل تۋرالى مەملەكەتتىك مۇلىك جانە جەكەشەلەندىرۋ كوميتەتى ءمالىم ەتتى. 

«قازاقتەلەكومنىڭ» 3 084 893 جاي اكسياسى رەسپۋبليكالىق مەنشىككە قابىلدانعان. ونىڭ ىشىندە Skyline Investment Company S.A-دان 2 671 481 جاي اكسيا (24،95 پايىز) – ساتىبالدىنىڭ جالعىز اكسيونەرى (قۇجاتتاردا ساتىبالدۋلى دەپ كورسەتىلگەن)، Alatau Capital Invest-تەن – 413 412 جاي اكسيا (3،8 پايىز)، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

ۆەدومستۆودا قوسىلعان بۇل قۇجاتتار پاكەتى باعالاۋدان كەيىن ۇكىمەت قاۋلىسىمەن «سامۇرىق-قازىنا» قورىنىڭ ورنالاستىرىلعان اكسيالارى ءۇشىن تولەم رەتىندە اۋدارىلادى.

قايرات ساتىبالدى – قازاقستاننىڭ ەكس-پرەزيدەنتى نۇرسۇلتان نازاربايەۆتىڭ نەمەرە ءىنىسى. 2022 جىلدىڭ قىركۇيەگىندە ونىڭ مۇلكى تاركىلەنىپ، مەملەكەتتىك ناگرادالارىنان جانە ۇقك گەنەرال-مايورى شەنىنەن ايرىلىپ، 10 جىل مەملەكەتتىك قىزمەتكە تۇرۋعا تىيىم سالۋ ارقىلى التى جىلعا باس بوستاندىعىنان ايىرىلدى.

قايرات ساتىبالدى ناۋرىز ايىندا قاماۋعا الىنعان.

قازاقستاننىڭ سىبايلاس جەمقورلىققا قارسى قىزمەتى تامىز ايىندا سوت الدىندا «تەرگەۋ بارىسىندا سوتتالۋشىلاردىڭ زاڭسىز يەمدەنگەن مۇلكى مەن جالپى سوماسى 500 ملن دوللاردان استام قاراجاتى مەملەكەتكە قايتارىلعانىن» حابارلادى.

سونداي-اق ساتىبالدىعا قاتىستى «سالىق جانە كەدەندىك تولەۋدەن جالتارۋ، قىلمىستىق كىرىستەردى زاڭداستىرۋ فاكتىلەرى بويىنشا» ىستەر قوسىمشا تەكسەرىلىپ جاتقانى حابارلاندى.