باقىتگۇل حامەنوۆانىڭ ىسىنە قاتىستى كەزەكتى سوت وتىرىسى كەيىنگە قالدى

ادۆوكات سۋدياعا سوت وتىرىسىن كەلەسى اپتاعا اۋىستىرۋ تۋرالى جازباشا ءوتىنىش تۇسىرگەن

باقىتگۇل حامەنوۆانىڭ ىسىنە قاتىستى سوت وتىرىسى كەيىنگە قالدى. بۇعان ونىڭ ادۆوكاتىنىڭ سوت وتىرىسىنا قاتىسا المايتىنى سەبەپ بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

بۇگىن، 27 قازاندا اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ىسىنە قاتىستى كەزەكتى سوت وتىرىسى ءوتۋى ءتيىس ەدى. الايدا، وتىرىس وتكەن جوق. بۇعان باقىتگۇل حامەنوۆانىڭ ادۆوكاتى يگور ۆرانچيەۆتىڭ دەنساۋلىعىنا بايلانىستى سوت وتىرىسىنا كەلمەي قالۋى سەبەپ بولدى. ادۆوكات سۋدياعا سوت وتىرىسىن كەلەسى اپتاعا اۋىستىرۋ تۋرالى جازباشا ءوتىنىش تۇسىرگەن.

ايتا كەتسەك، وبلىستىق سوتتىڭ باسپا ءسوز قىزمەتىنىڭ اقپاراتىنا سۇيەنسەك، بيىلعى 26 مامىردا اتىراۋ قالاسىنىڭ №2 سوتىنا ق ر قىلمىستىق كودەكسى 366-بابىنىڭ 3-بولىگى 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقالييەۆكە، ق ر قىلمىستىق كودەسى 367-بابىنىڭ 2-بولىگىمەن «ب» ج ش س ديرەكتورىنا قاتىستى قىلمىستىق ءىس ءتۇستى.

باقىتگۇل حامەنوۆا اتىراۋ وبلىسى اكىمىنىڭ ورىنباسارى لاۋازىمىنا 2020 جىلعى ناۋرىزدا تاعايىندالعان ەدى.
بىلتىرعى جەلتوقساندا ول تەرگەۋ يزولياتورىنا قاماۋعا الىندى.

وسىعان بايلانىستى بيىلعى تامىزدا وبلىس اكىمىنىڭ ورىنباسارى قىزمەتىنەن بوساتىلدى.
ال، 11 تامىزدا باقىتگۇل حامەنوۆاعا قاتىستى سوت وتىرىسى باستالدى. ونىڭ ءىسى اتىراۋداعى №2 قالالىق سوتتا قارالىپ جاتىر. ايىپتاۋ اكتىسى 55 بەتتەن تۇرادى.

العاشقى سوت وتىرىسىندا باقىتگۇل حامەنوۆا وزىنە تاعىلعان ايىپتى مويىنداعان جوق.
سوت وتىرىسى 6 قىركۇيەكتە قايتا جالعاسىپ، وبلىس اكىمىنىڭ بۇرىنعى ورىنباسارى جىبەرگەن قاتەلىگى تۋرالى ايتتى.
بۇدان كەيىنگى سوت وتىرىسىندا باسقارما باسشىسى وعان جالا جاپقانى تۋرالى ايتقان ەدى.

كەيىن باقىتگۇل حامەنوۆا تاعى دا تەرگەۋ يزولياتورىنان ءۇي قاماققا جىبەرىلمەگەنىن جازعان ەدىك.
ەندى اتىراۋ وبلىسى اكىمىنىڭ بۇرىنعى ورىنباسارىنا قاتىستى سوت وتىرىسى كەلەسى دۇيسەنبىدە، 31 قازاندا ساعات 10:00-دە وتەدى.