الماتىدا پوليسيا فۋتبول ماچى كەزىندە قاۋىپسىزدىك شارالارى تۋرالى ايتتى.
"قايرات" پەن "رەال مادريد" كوماندالارى اراسىنداعى حالىقارالىق فۋتبول ماچىنىڭ قارساڭىندا الماتى قالاسىنىڭ پوليسيا دەپارتامەنتى قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋگە باعىتتالعان كەشەندى شارالار قابىلدادى، - دەپ حابارلايدى Aqshamnews.kz.
قىزمەتكە 2،5 مىڭنان استام پوليسيا قىزمەتكەرى، سونداي-اق ۇلتتىق ۇلاننىڭ 300 اسكەري قىزمەتشىسى جۇمىلدىرىلادى.
ولاردىڭ مىندەتى – قوعامدىق ءتارتىپتى ساقتاۋ، جانكۇيەرلەر مەن ماچقا قاتىسۋشىلاردىڭ قاۋىپسىزدىگىن قامتاماسىز ەتۋ، سونداي-اق جول قوزعالىسىن رەتتەۋ. جول قاۋىپسىزدىگىنە ەرەكشە نازار اۋدارىلدى.
ورتالىق ستاديون ماڭىندا كولىك قوزعالىسىنا شەكتەۋ قويىلۋى مۇمكىن، سوندىقتان ءتارتىپ ساقشىلارى قالا تۇرعىندارىنان باعىتتارىن الدىن الا جوسپارلاپ، ۋاقىتشا شارالارعا تۇسىنىستىكپەن قاراۋدى سۇرايدى.
- سونىمەن قاتار ءبىز بارلىق جانكۇيەرلەر مەن قالا تۇرعىندارىن الاياقتىقتىڭ الدىن الۋ ماقساتىندا كۇماندى ينتەرنەت-پلاتفورمالاردان جانە "قولما-قول" ساتىلىمنان بيلەت ساتىپ الۋدان باس تارتۋعا شاقىرامىز. الماتى پوليسياسى سپورت مەرەكەسىنىڭ ءقاۋىپسىز ءارى جايلى ءوتۋى ءۇشىن بارلىق قاجەتتى شارالاردى قابىلداپ جاتىر. قاۋىپسىزدىك تەك قۇقىق قورعاۋ ورگاندارىنا عانا ەمەس، ءار جانكۇيەردىڭ سانالى ارەكەتىنە دە بايلانىستى. قابىلدانىپ جاتقان شارالارعا تۇسىنىستىكپەن قاراپ، پوليسيامەن ىنتىماقتاستىقتا بولۋلارىڭىزدى سۇرايمىز. ءبىزدىڭ باستى ماقساتىمىز – ازاماتتاردىڭ قاۋىپسىزدىگى مەن قۇقىقتىق ءتارتىپتى ساقتاۋ، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ