2025–2026 وقۋ جىلىندا تەحنيكالىق جانە كاسىپتىك ءبىلىم بەرۋ ۇيىمدارىندا دۋالدى وقۋمەن قامتىلعان ستۋدەنتتەر سانى 135 مىڭعا جەتەدى، - دەپ حابارلايدى Aqshamnews.kz.
ق ر وقۋ-اعارتۋ مينيسترلىگىنىڭ باسپا ءسوز قىزمەتى بۇل وتكەن جىلمەن سالىستىرعاندا 27 مىڭعا كوپ ەكەنىن ناقتىلايدى.
دۋالدى وقىتۋ تەوريالىق دايىندىقتى تاجىريبەمەن ۇشتاستىرۋعا مۇمكىندىك بەرەدى. وقۋ ۋاقىتىنىڭ 60%-ىن ستۋدەنتتەر تىكەلەي وندىرىستە وتكىزىپ، سۇرانىسقا يە ماماندىقتاردى ءىس جۇزىندە مەڭگەرەدى.
بۇگىندە بۇل جۇيەگە ەلىمىزدەگى 552 كوللەدجدە 18 مىڭنان استام كاسىپورىن قاتىسادى. ولاردىڭ قاتارىندا ماشينا جاساۋ، قۇرىلىس، ەنەرگەتيكا، IT جانە سەرۆيس سالاسىنداعى ءىرى كومپانيالار بار. مۇنداي ىنتىماقتاستىق فورماتى ستۋدەنتتەرگە تاجىريبەلىك ماشىق بەرەدى، ال جۇمىس بەرۋشىلەر ءۇشىن – ءوندىرىستىڭ ناقتى سۇرانىسىنا ساي بىلىكتى كادرلار دايارلاۋدى قامتاماسىز ەتەدى.
«دۋالدى وقىتۋدى دامىتۋ – تەحنيكالىق جانە كاسىپتىك ءبىلىم بەرۋ جۇيەسىندەگى باسىم باعىتتاردىڭ ءبىرى. بۇگىندە مەملەكەتتىك تاپسىرىس بويىنشا ءبىلىم العان كوللەدج تۇلەكتەرىنىڭ 70%-دان استامى وقۋىن ءتامامداعان سوڭ بىردەن ءوز ماماندىعى بويىنشا جۇمىسقا ورنالاسادى»، – دەيدى تەحنيكالىق جانە كاسىپتىك ءبىلىم بەرۋ دەپارتامەنتىنىڭ ديرەكتورى اسەت مۋحانبەتوۆ.
2024 جىلى مەملەكەتتىك تاپسىرىس نەگىزىندە دۋالدى وقىتۋ فورماتىندا وقۋىن اياقتاعان تۇلەكتەر سانى 30 مىڭنان استى، ولاردىڭ 71%-ى ءقازىردىڭ وزىندە جۇمىسقا ورنالاسقان.
جۇمىسشى ماماندىقتارى جىلى جانە تەحنيكالىق-كاسىپتىك ءبىلىم بەرۋ جۇيەسىن ترانسفورماسيالاۋ اياسىندا 2027 جىلعا قاراي دۋالدى جۇيەمەن وقيتىن ستۋدەنتتەردىڭ ۇلەسى 50%-عا دەيىن وسەدى. نەگىزگى باستامالاردىڭ قاتارىندا – گەرمانيانىڭ ەرفۋرت ۋنيۆەرسيتەتىمەن بىرلەسىپ حالىقارالىق دۋالدى وقىتۋ ورتالىعىن اشۋ، سونداي-اق «اتامەكەن» ۇكپ قولداۋىمەن تالىمگەرلىك ينستيتۋتىن دامىتۋ بار.