2025 جىلعى تامىز ايىندا «Enbek.kz» ەلەكتروندىق ەڭبەك بيرجاسىنا (بۇدان ءارى – ەەب) 239،8 مىڭ بوس جۇمىس ورنى جاريالانىپ، جۇمىس ىزدەۋشىلەر تاراپىنان 138،5 مىڭ تۇيىندەمە ورنالاستىرىلدى. وتكەن ايمەن سالىستىرعاندا ەەب-دەگى بوس ورىندار سانى 128،9%-عا (+135 مىڭ) ارتقان، ال تۇيىندەمەلەر سانى 6،3%-عا (-9،3 مىڭ) ازايدى، - دەپ حابارلايدى Aqshamnews.kz.
بوس جۇمىس ورىندارىنىڭ باسىم بولىگى كەلەسى سالالارعا تيەسىلى: ءبىلىم بەرۋ (120،7 مىڭ)، اقپارات جانە بايلانىس (17،4 مىڭ)، باسقا دا قىزمەت كورسەتۋ تۇرلەرى (17،1 مىڭ)، وڭدەۋ ونەركاسىبى (15 مىڭ). بۇل ءتورت سالا تامىز ايىنداعى جالپى سۇرانىستىڭ 70%-دان استامىن قۇرادى. ايتا كەتسەك، ءبىلىم بەرۋ سالاسىنداعى ءار بەسىنشى بوس جۇمىس ورنى (18،5%) استانا جانە الماتى قالالارىندا ورنالاستىرىلعان.
سۇرانىس قۇرىلىمىندا جوعارى بىلىكتى كادرلارعا باسىمدىق بەرىلدى – بۇل ساناتقا 124،1 مىڭ بوس جۇمىس ورنى نەمەسە 52% سايكەس كەلەدى. جوعارى بىلىكتى كادرلارعا ارنالعان بوس ورىنداردىڭ ۇشتەن ەكىسى (81،6 مىڭ) ءبىلىم بەرۋ جانە تاربيە سالاسىنداعى ماماندارعا تيەسىلى. ورتا بىلىكتى ماماندارعا سۇرانىس – 31% (75،2 مىڭ)، ال بىلىكتىلىگى جوق جۇمىسشىلارعا – 17% (40،4 مىڭ).
بوس جۇمىس ورىندارىنىڭ ەڭ ۇلكەن ءوسىمى كەلەسى وڭىرلەردە تىركەلدى: الماتى وبلىسى – +387،5% (20،3 مىڭعا دەيىن)، جامبىل وبلىسى – +377،4% (15،9 مىڭعا دەيىن)، باتىس قازاقستان وبلىسى – +242،4% (12،3 مىڭعا دەيىن)، اقتوبە وبلىسى – +198،4% (14،1 مىڭعا دەيىن) جانە جەتىسۋ وبلىسى – +182،7% (5،8 مىڭعا دەيىن).
جالپى تۇيىندەمە سانىنىڭ ازداپ تومەندەۋىنە قاراماستان، كوپتەگەن وڭىرلەردە ىزدەنۋشىلەر بەلسەندىلىگى ارتتى. ەڭ ۇلكەن ءوسىم الماتى وبلىسىندا (+31،4%، 9،7 مىڭعا دەيىن)، الماتى قالاسىندا (+30،4%، 11 مىڭعا دەيىن) جانە تۇركىستان وبلىسىندا (+17%، 18 مىڭعا دەيىن) بايقالدى. سونىمەن قاتار، كەيبىر وڭىرلەردە بەلسەندىلىكتىڭ تومەندەۋى تىركەلدى: شىمكەنت قالاسى (-50،2%، 9،7 مىڭعا دەيىن)، سولتۇستىك قازاقستان وبلىسى (-18،4%، 2،3 مىڭعا دەيىن) جانە قاراعاندى وبلىسى (-16،4%، 5،6 مىڭعا دەيىن).
كاسىپتەر بويىنشا ەڭ كوپ سۇرانىسقا يە ماماندىقتار – PR-مەنەدجەرلەر (16،3 مىڭ بوس ورىن)، ماتەماتيكا ءپانىنىڭ مۇعالىمدەرى (7،6 مىڭ) جانە تاربيەشىلەر (6،1 مىڭ) بولدى. ورتا بىلىكتى ماماندار اراسىندا – تاربيەشى كومەكشىلەرى (4،4 مىڭ)، كۇزەتشىلەر (2،7 مىڭ) جانە اۆتوكولىك جۇرگىزۋشىلەرى (2،6 مىڭ) سۇرانىسقا يە.
ەڭ جوعارى جالاقى كۇتكەن كانديداتتار – تەحنيكالىق ديرەكتورلار (ورتاشا 1،2 ملن تەڭگە)، ۇشقىشتار (~1،2 ملن تگ) جانە كوممەرسيالىق ديرەكتورلار (~1،1 ملن تگ). بۇل رەتتە تامىز ايىندا جۇمىس بەرۋشىلەر ۇسىنعان ەڭ جوعارى جالاقىلار – كەن ءوندىرۋ سالاسىنداعى سەح باسشىسى (شامامەن 843،8 مىڭ تەڭگە)، ەنەرگيامەن جابدىقتاۋ قىزمەتى باسشىسىنىڭ ورىنباسارى (~733 مىڭ تەڭگە) جانە IT سالاسىنداعى باعدارلامالار باس رەداكتورى (~718 مىڭ تەڭگە) لاۋازىمدارىنا تيەسىلى.
وسىلايشا، 2025 جىلعى تامىزدا ەەب الاڭىندا تۇيىندەمەلەر سانىنىڭ قالىپتى تومەندەۋىمەن جوعارى بىلىكتى جۇمىس كۇشىنە دەگەن سۇرانىستىڭ وسكەنى بايقالدى. بۇل ءوسىم جاڭا وقۋ جىلىنىڭ قارساڭىندا ءبىلىم بەرۋ سالاسىندا ورىن العان ماۋسىمدىق فاكتورلارمەن، اتاپ ايتقاندا، مۇعالىمدەر (سونىڭ ىشىندە باستاۋىش سىنىپ مۇعالىمدەرى)، تاربيەشىلەر جانە ولاردىڭ كومەكشىلەرى بويىنشا بوس ورىنداردىڭ جاپپاي جاريالانۋىمەن بايلانىستى بولدى.