2025 جىلعى 26 تامىزدا الماتىدا بارشا قازاقستاندىق كۇتكەن تاريحي ماچ وتەدى. ۋەفا چەمپيوندار ليگاسىنىڭ پلەي-وفف كەزەڭىندە "قايرات" پەن "سەلتيك" قايتا كەزدەسەدى. العاشقى ويىندا قوس كوماندا تەڭ تارقاسىپ، بۇل قارىمتا كەزدەسۋگە دەگەن قىزىعۋشىلىقتى بۇرىنعىدان دا ارتتىردى. "قايرات" ءۇشىن مۇنداي دەڭگەيدەگى ويىن بۇرىن-سوڭدى بولماعاندىقتان، جانكۇيەرلەر دە ەرەكشە ۇمىتپەن كۇتىپ وتىر. وسى ورايدا اqshamnews.kz ءتىلشىسى ساراپشى اينات قابيدۋللادان الداعى ويىنعا قاتىستى پىكىرىن سۇراپ، "قايراتتىڭ" مۇمكىندىكتەرى جايلى اقپار الدى.
"توسىن ناتيجە، كۇتپەگەن سەنساسيا"
ساراپشىنىڭ ايتۋىنشا، كوپشىلىك "قايراتتان" مۇنداي جەتىستىك كۇتپەگەن.
"بۇل - "قايرات" ءۇشىن تاريحي ماڭىزدى ويىن. كلۋب تاريحىندا ءدال وسىنداي دەڭگەيدەگى شەشۋشى ماچتەر بۇرىن بولماعان. كوپشىلىك جانكۇيەر "قايراتتى" ارى كەتسە كونفەرەنسيا ليگاسىندا وينايدى دەپ بولجاعان ەدى. الايدا ءۋرازباحتيننىڭ شاكىرتتەرى "سلوۆاندى" جەڭىپ، كۇتپەگەن سەنساسيا جاسادى. ەندى "سەلتيككە" قارسى ەكى ويىندا دا فاۆوريت شوتلاندتىقتار ەكەنى انىق. ءبىراق "سارى-قارالار" گلازگودا ەش قورىقپاي ويناپ، شابۋىلعا شىعىپ، ناعىز مىنەز كورسەتتى. ءتىپتى وفسايدتان بولسا دا گول سوعىپ ۇلگەردىك"، - دەدى اينات قابيدۋللا.
"الماتىدا "سەلتيككە" وڭاي بولمايدى"
ساراپشى ءماچتىڭ الماتىداعى احۋالى قوناقتارعا ىڭعايسىز بولاتىنىن ەرەكشە اتادى.
"الماتىداعى ماچ قوناقتار ءۇشىن وڭاي بولمايدى. "سەلتيك" بۇعان دەيىن قازاقستاندىق كلۋبتارعا قارسى سىرت الاڭدا جەڭىسكە جەتىپ كورمەگەن. ال "قايرات" بيىلعى ەۋروكۋبوك ماۋسىمىندا ءوز الاڭىندا ءالى جەڭىلگەن جوق. بۇل - كۇللى ەۋروپانى تاڭعالدىرىپ وتىرعان جەتىستىك. ونىڭ ۇستىنە، الماتىعا كەلگەن ءاربىر ويىنشىعا جەرگىلىكتى تاۋلى ايماقتىڭ اۋا رايىنا بەيىمدەلۋ وڭاي ەمەس، مۇندا قىسىم وزگەشە، ستاديونداعى الاڭ ساپاسى دا ەۋروپاداعىداي ءمىنسىز ەمەس. سوندىقتان "سەلتيكتىڭ" ءبىزدىڭ الاڭدا قينالىپ قالۋى ابدەن مۇمكىن"، - دەيدى ول.
"نەگىزگى قيىندىق – باستى ويىنشىلاردىڭ جوعى"
دەگەنمەن ساراپشى "قايراتتىڭ" ءوز قيىندىقتارى دا بارىن جاسىرمادى.
"قايرات" ءۇشىن باستى قيىندىقتاردىڭ ءبىرى - داستان ساتپايەۆتىڭ بولماۋى. شابۋىل شەبىندە ونىڭ ورنىن باساتىن ويىنشىلار بار بولعانىمەن، كوماندانى داستانسىز ەلەستەتۋ قيىن. تاعى ءبىر ۇلكەن شىعىن - الەكساندر زارۋسكييدىڭ جاراقاتى. ول تەك وسى ويىندا عانا ەمەس، ماۋسىمنىڭ سوڭىنا دەيىن كومانداعا كومەكتەسە المايدى. ونىڭ ورنىن باساتىن تەمىرلان اناربەكوۆ پرەمەر-ليگادا سەنىمدى ويناپ ءجۇر، ءبىراق ونىڭ دەڭگەيى چەمپيوندار ليگاسىنىڭ قارقىنىنا سايكەس كەلە مە؟ بەلگىسىز. دەگەنمەن بار ءۇمىتىمىز تەمىرلاندا."
"بارلىعى العاشقى مينۋتتاردا شەشىلۋى مۇمكىن"
ساراپشى "قايراتتىڭ" ويىنى ماچ باسىندا شەشىلۋى ىقتيمال دەپ سانايدى.
""قايراتتىڭ" چەمپيوندار ليگاسىنىڭ توپتىق كەزەڭىندە ويناۋعا تولىققاندى مۇمكىنشىلىگى بار. مەنىڭشە "قايرات" بارلىق شارۋانى العاشقى 15 مينۋتتا شەشۋگە تىرىسادى. العاشقى مينۋتتاردا گول سوعىپ، قارسىلاس كوماندانى قورعانىستان وتكىزبەي، پەنالتي سەرياسىنا جەتكىزبەي، جەڭۋى قاجەت. ەدميلسون گول اۆتورى اتانۋى مۇمكىن جانە بۇرىشتامادان بويىنىڭ ۇزىندىعىن پايدالانىپ ەگور سوروكين دە سوعىپ كەتۋى مۇمكىن دەگەن بولجامىم بار."
"قايرات" ءۇشىن بۇل ماچ - تەك پلەي-وفف ەمەس، تۇتاس قازاقستاندىق فۋتبولدىڭ تاريحىن قايتا جازاتىن مۇمكىندىك. شوتلانديالىق الپاۋىتپەن تەڭ دارەجەدە كۇرەسۋ - ۇلكەن جەتىستىك، ال توپتىق كەزەڭگە ءوتۋ - جاڭا ءداۋىردىڭ باستاۋى بولماق.
وتكەن ويىندا نە ەستە قالدى؟
18 جاستاعى شەرحان قالمۇرزا "جۇلدىز" اتاندى.
"سەلتيك پاركتەگى" تارتىستى ساتتە نەگىزگى قاقپاشى زارۋسكيي جاراقات الدى، ال ونىڭ ورنىنا تۇسكەن اناربەكوۆ تە اۋىر سوققى الدى. سول كەزدە تەلەكامەرالار سكامەيكاداعى جاس قاقپاشى شەرحان قالمۇرزانى كورسەتىپ، ول الەۋمەتتىك جەلىلەردە بىردەن تالقىلاندى. كوپشىلىك ونى "ءالى الاڭعا شىقپاي جاتىپ حالىق جۇلدىزىنا اينالدى" دەپ باعالادى.
كورەرمەن رەكوردى تىركەلدى.
ءماچتى ستاديوندا 56 مىڭ جانكۇيەر تاماشالادى. بۇل - چەمپيوندار ليگاسىنىڭ پلەي-وفف كەزەڭىندەگى ەڭ جوعارى كورسەتكىش ءارى قازاقستاندىق كلۋبتار قاتىسقان ويىندار تاريحىنداعى رەكورد. بۇعان دەيىنگى ەڭ ۇلكەن اۋديتوريا دا ءدال وسى "سەلتيك پاركتە" تىركەلگەن بولاتىن.
داستان ساتپايەۆتىڭ سارى قاعازى.
ويىننىڭ ەڭ سوڭعى مينۋتىندا جاس شابۋىلشى داستان ساتپايەۆ قارسىلاستىڭ پاسىن بوگەپ، سارى قاعاز الدى. بۇل ونىڭ ءۇشىنشى ەسكەرتۋى بولىپ، ەرەجە بويىنشا كەلەسى ماچكە قاتىسا المايتىن بولدى. وسى ءسات جانكۇيەرلەردىڭ ەسىندە ەرەكشە قالدى، ويتكەنى "قايرات" الداعى شەشۋشى ويىندا نەگىزگى ويىنشىسىز قالادى.
ايتا كەتەيىك، 26 تامىزدا الماتىداعى ورتالىق ستاديوندا "قايرات" پەن شوتلانديالىق "سەلتيك" تاعى دا كەزدەسەدى. بيلەتتەر 19 جانە 25 تامىزدا اشىلعانىمەن، لەزدە ساتىلىپ كەتتى.