بۇگىن، 9 جەلتوقساندا، استانادا چەمپيوندار ليگاسىنىڭ جالپى كەزەڭىنىڭ التىنشى تۋرىنداعى ماچ وتەدى. وندا الماتىلىق "قايرات" پەن پيرەيدىڭ "وليمپياكوسى" كەزدەسەدى، - دەپ حابارلايدى aqshamnews.kz ءتىلشىسى.
ءماچتى قاشان جانە قايدان كورۋگە بولادى؟
كەزدەسۋ استانا ۋاقىتىمەن 20:30-دا باستالادى. ويىندى تىكەلەي ەفيردە Qazaqstan تەلەارناسى كورسەتەدى. سونداي-اق ءماچتى ارنانىڭ رەسمي سايتىنان دا تاماشالاۋعا بولادى.
ءماچتىڭ باس تورەشىسى بولىپ يسپانيالىق حۋان مارتينەس تاعايىندالدى. وعان قاپتالداعى كومەكشىلەرى راۋل كابانەرو مەن ينيگو پريەتو جاردەمدەسەدى. ءتورتىنشى تورەشى مىندەتىن حاۆەر البەرولا اتقارادى. VAR جۇيەسىنە كارلوس دەل سەررو جاۋاپ بەرەدى، ونىڭ اسسيستەنتى – حاۆەر يگلەسياس ۆيليانۋيەۆا.
چل-داعى ماچ الدىنداعى كوماندالاردىڭ جاعدايى
"سارى-قارالاردىڭ" قورجىنىندا ءبىر ۇپاي بولسا، گرەك كلۋبىندا ەكى ۇپاي بار. چەمپيوندار ليگاسىنىڭ نەگىزگى كەزەڭىندە الماتىلىقتار كيپردىڭ "پافوسىمەن" (0:0) تەڭ ويناپ، ليسسابوننىڭ "سپورتينگىنەن" (1:4)، ءمادريدتىڭ "رەالىنان" (0:5)، ميلاننىڭ "ينتەرىنەن" (1:2) جانە دانيانىڭ "كوپەنگاگەنىنەن" (2:3) جەڭىلگەن.
جالپى تۋرنيرلىك كەستەدە "قايرات" 35-ورىندا، ال "وليمپياكوس" 33-ساتىدا تۇر.