اتىراۋدا دەنەسى سەگىز ايدان كەيىن تابىلعان يانا لەگكوديموۆانىڭ ولىمىنە قاتىستى سوت جالعاسىپ جاتىر. 23 جاستاعى بويجەتكەندى ولتىرگەندەر مارقۇمنىڭ ۇيالى تەلەفونىن ەمىن-ەركىن پايدالانعانى انىقتالدى. كۇدىكتىلەر يانانىڭ اتىنان دوستارىنا ءتۇن ىشىندە جازبا جىبەرىپ، قىلمىسىن جاسىرماق بولعان. كەيىن باستى كۇدىكتى ريزۋان قايىرجانوۆ ەكەۋارا جازبانى تۇگەل ءوشىرىپ تاستاعان. ال مارقۇمنىڭ اناسىنىڭ ايتۋىنشا، يانانى تۇنشىقتىرىپ ولتىرمەس بۇرىن، قوس كۇدىكتى قىزدى ابدەن ازاپتاعان، - دەپ حابارلايدى aqshamnews.kz ءتىلشىسى "كتك" ارناسىنا سىلتەمە جاساپ.
يانا لەگكوديموۆانى ايۋاندىقپەن ولتىرگەن كۇدىكتىلەر ونىڭ ۇيالى تەلەفونىن الىپ، كۋرستاسىنا جازبا جىبەرگەن. اناسىنىڭ ايتۋىنشا، مۇنىڭ ءبارى قىلمىستى جاسىرۋ ماقساتىندا جاسالعان. كەيىن مارقۇمنىڭ ول دوسى تەرگەۋگە شاقىرىلىپ، ءتىپتى كۇدىككە ىلىنگەن.
"العاشقى كۇنى ونى دا شاقىردى. نە سەبەپ بولعانىن بىلمەيمىن، ريزۋاندى جىبەرىپ قويىپ، ونى الىپ قالعان. بەكانىڭ موينىنا قىزىمنىڭ ءولىمىن ىلگىسى كەلدى. ول كەيىن قالادان كەتىپ قالدى. باسقا ءوڭىردىڭ جىگىتى. پسيحولوگيالىق تۇرعىدان اۋىر تيگەن"، - دەدى مارقۇمنىڭ اناسى گالينا لەگكوديموۆا.
سوتتالۋشى ريزۋان قايىرجانوۆ تەرگەۋدە "يانادان تاياق جەدىم" دەپ تۇسىنىكتەمە بەرىپتى. ياعني مارقۇم وعان قول جۇمساپ، تۇنشىقتىردى دەگەن. الايدا اناسى مۇنىڭ ءبارىن جوققا شىعاردى.
"مەكتەپتە، ۋنيۆەرسيتەتتە، ءتىپتى كوشەدە بىردە‑ءبىر اداممەن ۇرسىسىپ كورگەن ەمەس. ۇرىس-كەرىسكە جوق ەدى. ۇرىپ-سوقپاق تۇگىلى، داۋىسىن قاتتى كوتەرمەيتىن. قىزىمدى تۇنشىقتىرىپ جاتقاندا، ول ءتىپتى قارسىلىق تا كورسەتە الماعان. قىلمىسكەردىڭ ۇستىندە بىردە-بىر سىزات جوق. ويتكەنى قىزىمنىڭ كىشكەنتاي قول سۇيەكتەرىن سىندىرىپ تاستاعان. قىزىم وتە نازىك ەدى"، - دەدى مارقۇمنىڭ اناسى گالينا لەگكوديموۆا.
مارقۇمنىڭ بويى 160-162 سانتيمەتر، سالماعى بار-جوعى 40 كەلى ەكەن. اناسىنىڭ ايتۋىنشا، قىزىن تەك تۇنشىقتىرىپ ولتىرمەگەن، ۇرىپ-سوعىپ ازاپتاعان. پروكۋرور قىلمىستىق ءىس بارىسىندا الىنعان ايعاقتاردى اشىپ كورسەتتى. سەگىز ايدان كەيىن تابىلعان سۇيەك قالدىقتارىن مارقۇمنىڭ ءتىس ششەتكاسىنان الىنعان دنك سىنامامەن ازەر انىقتاپتى. ايعاقتار اراسىندا مايىتىمەن بىرگە تابىلعان جەيدەسى دە بار. سوتتالۋشى تاراپتىڭ قورعاۋشىسى كەيبىر دالەلدەرگە قارسىلىق بىلدىرگەنمەن، ايىپتالۋشى كىناسىن ءوزى مويىندادى.
ايتا كەتەيىك، 23 جاستاعى بويجەتكەندى ءولتىردى دەگەن كۇدىكپەن 24 جاستاعى ريزۋان قايىرجانوۆ پەن ونىڭ 25 جاستاعى دوسى التىنبەك كاتيموۆ قاماۋعا الىنعان.