مادريدتىك «رەالدىڭ» باس باپكەرى حابي الونسو الماتىدا وتكەن UEFA چەمپيوندار ليگاسىنىڭ تاريحي كەزدەسۋىنەن كەيىن اسەرىن ءبولىستى، دەپ حابارلايدى اqshamnews.kz ءتىلشىسى Vesti.kz-كە سىلتەمە جاساپ. يسپانيالىق كلۋب جەرگىلىكتى «قايراتتى» 5:0 ەسەبىمەن ۇتقان بولاتىن.
"قايرات" ءبىزدى تاڭعالدىردى"
الونسو ماچتان كەيىنگى باسپا ءسوز ءماسليحاتىندا الماتىلىق كلۋبتىڭ ويىنىنا باعا بەردى.
“قايرات” چەمپيوندار ليگاسىندا ويناۋعا تولىق لايىق. ءبىز الماتىعا كەلگەندە بۇل كوماندانىڭ الەۋەتىن كوردىك. ءبىزدى جىلى قابىلدادى، مۇندا ەرەكشە اتموسفەرا بار. "قايرات” ويىندى وتە بەلسەندى باستادى. العاشقى مينۋتتاردا بىزگە ءسال قولايسىز بولدى. سودان كەيىن عانا كومبيناسيا قۇرىپ، ولاردىڭ پرەسسينگىنەن شىعۋعا تىرىستىق. بۇعان اردا گيۋلەر كوپ كومەكتەستى. “قايراتتىڭ” بەلسەندىلىگى ءبىزدى تاڭعالدىردى"، - دەدى حابي الونسو.
الماتىنىڭ سۇلۋلىعى باپكەردى ءتانتى ەتتى
يسپانيالىق مامان قالا كورىنىسىنە دە باعا بەردى:
"ءبىز ءجيى ساياحاتتايمىز، ءبىزدى تاڭعالدىرۋ وڭاي ەمەس. ءبىراق الماتىنىڭ تابيعاتى وتە ادەمى، اسىرەسە تاۋلارى ەرەكشە اسەر قالدىردى. ەگەر تۋريست رەتىندە كەلسەم، مىندەتتى تۇردە تاۋعا شىعار ەدىم"، - دەدى ول.
مباپپە - ماچتىڭ جۇلدىزى
الونسو فرانسۋز فورۆاردى كيليان مباپپەنى ەرەكشە ماقتاپ ءوتتى. ايتا كەتەيىك، ول ويىندا حەت-تريك جاساپ، ۇزدىك ويىنشى اتاندى.
"كيليان ءار ماچتا نەگىزگى ءرول اتقارادى، اسىرەسە قاقپا الدىندا وتە ءقاۋىپتى سوققىلار جاسايدى. ونىڭ ءبىرىنشى گولى كەرەمەت بولدى. ماعان ونىڭ فورماسى ۇنايدى، ول بيىلعى ماۋسىمدا فانتاستيكالىق ويىن كورسەتىپ ءجۇر"، - دەدى باپكەر.
ايىپ دوبى VAR شەشىمىمەن جويىلدى
ايتا كەتەيىك، ويىننىڭ 68-مينۋتىندا «قايرات» ءبىر گول سوعۋعا مۇمكىندىك العانداي ەدى. اربيتر باستاپقىدا پەنالتي بەلگىلەدى، ءبىراق ۆيدەونى قايتا قاراۋدان سوڭ شەشىمىن وزگەرتتى.