الماتىدا «قايرات» پەن «رەال» اراسىنداعى تاريحي ماچ اياقتالدى. ويىن ناتيجەسى بويىنشا يسپاندىقتار ءىرى ەسەپپەن جەڭدى، دەپ حابارلايدى Aqshamnews.kz ءتىلشىسى.
الماتىدا UEFA چەمپيوندار ليگاسىنىڭ جالپى كەزەڭىندەگى تاريحي كەزدەسۋ ءوتتى. جەرگىلىكتى «قايرات» ايگىلى مادريدتىك «رەالعا» قارسى العاش رەت ءوز الاڭىندا ويناپ، 0:5 ەسەبىمەن جەڭىلىپ قالدى.
ماچ ەكىنشى تۋر اياسىندا ءوتتى. ويىننىڭ العاشقى مينۋتتارىنان-اق قوس كوماندانىڭ باستى جۇلدىزدارى الاڭعا شىقتى: كيليان مباپپە، ۆينيسيۋس جۋنيور، داستان ساتپايەۆ پەن شەرحان قالمۇرزا.
العاشقى تايم - مباپپەنىڭ پەنالتيى
25-مينۋتتا فرانسۋز شابۋىلشىسى كيليان مباپپە پەنالتيدەن ەسەپ اشتى. وسىلايشا ءبىرىنشى تايم «رەالدىڭ» پايداسىنا 0:1 ەسەبىمەن اياقتالدى.
ەكىنشى تايمدا «رەال» قارقىنىن كۇشەيتتى
ۇزىلىستەن كەيىن مادريدتىكتەر تولىق باسىمدىققا يە بولدى. 52 جانە 74-مينۋتتاردا تاعى دا مباپپە مەرگەندىگىمەن كوزگە ءتۇسىپ، حەت-تريك جاسادى - 0:3. وسى ارالىقتا «قايراتقا» پەنالتي بەلگىلەنگەن ەدى، ءبىراق VAR شەشىمىنەن كەيىن تورەشى ايىپ دوبىن الىپ تاستادى.
جەرگىلىكتى كوماندانىڭ باس باپكەرى رافاەل ۋرازباحتين ويىن بارىسىن وزگەرتۋ ءۇشىن بىرنەشە الماستىرۋ جاسادى. بايبەك، ەدميلسون، ستانويەۆ، ريكاردينو جانە جاراقاتتان كەيىن الاڭعا العاش شىققان زاريا ويىندى كۇشەيتۋگە تىرىستى. دەگەنمەن وزگەرىستەر ناتيجە بەرمەدى.
83-مينۋتتا ەدۋاردو كاماۆينگا ءتورتىنشى گولدى سوقتى. قوسىمشا ۋاقىتتا برايم دياس نۇكتە قويىپ، ەسەپتى 0:5-كە جەتكىزدى.
تاريحي كەزدەسۋ
بۇل ماچ مادريدتىك «رەالدىڭ» قازاقستانداعى العاشقى ويىنى بولدى. ال «قايرات» ءۇشىن ەۋروپانىڭ ەڭ تيتۋلدى كلۋبىمەن ءوز الاڭىندا العاش رەت كەزدەسۋدىڭ ءوزى ۇلكەن وقيعاعا اينالدى.
دەگەنمەن ويىن بارىسىندا قازاقستاندىق جانكۇيەرلەر ونلاين-ترانسلياسيا ساپاسىنا نارازىلىق ءبىلدىردى.
سۋرەتتەر: سامات قۇسايىنوۆ