سوڭعى 4 جىلدا سۋبسيديالاۋ سوماسى بەس ەسە وسكەن
ق ر يندۋستريا جانە ينفراقۇرىلىمدىق دامۋ مينيسترلىگى كولىك كوميتەتى ءتوراعاسىنىڭ ورىنباسارى التاي سەمبەك ۇلى وڭىرلەردە اۆتوبۋس پاركتەرىن جاڭارتۋ ماسەلەسىن كوتەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى كەزدە قالالارداعى اۆتوبۋس تاسىمالىندا 10 525 كولىك بار. ولاردىڭ توزۋ دەڭگەيى 46 پايىزعا جەتتى. قالاداعى اۆتوبۋس پاركىن جاڭارتۋ ماسەلەسى تاسىمالداۋشىلار شىعىندارىن سۋبسيديالاۋمەن تىعىز بايلانىستى. سوندىقتان ءتيىستى دەڭگەيدە سۋبسيديالاۋ سوماسىنا قاراي تاسىمالداۋشىلار وزدەرىنىڭ پاركتەرىن جاڭارتۋ مۇمكىندىگىنە يە بولادى»، - دەدى ا. سەمبەك ۇلى مينيسترلىكتە وتكەن كەڭەستە.
ونىڭ ايتۋىنشا، ەسكىرگەن اۆتوبۋستاردىڭ 50 پايىزدان استامى اقتاۋ، وسكەمەن، تالدىقورعان، پەتروپاۆل، ورال جانە قوستاناي قالالارىندا جولاۋشى تاسىمالداپ ءجۇر.
«سونىمەن قاتار، جەڭىلدىكپەن ليزينگ بويىنشا قارجىلاندىرۋ باعدارلاماسى اياسىندا وتىندىق ءوندىرىستىڭ اۆتوبۋستارىن جەتكىزۋ ءۇشىن 2018-2021 جىلدارى رەسپۋبليكالىق بيۋدجەتتەن 79 ملرد تەڭگەگە جۋىق ءبولىندى. وسى باعىتتا 2 283 اۆتوبۋس قامتاماسىز ەتىلدى»، - دەدى ۆەدومستۆو وكىلى.
بۇدان بۇرىن حابارلانعانداي، التاي سەمبەك ۇلى قالالاردا جولاۋشىلار تاسىمالى سالاسىندا الەۋمەتتىك ماڭىزداعى باعدارلاردى سۋبسيديالاۋ پروبلەمالارىن ايتتى.
سوڭعى 4 جىلدا سۋبسيديالاۋ سوماسى بەس ەسە ءوسىپ، 102 ملرد تەڭگەنى قۇرادى. دەگەنمەن بۇل قاراجاتتىڭ 80 پايىزعا جۋىعى تەك نۇر-سۇلتان، الماتى، شىمكەنت قالالارىنا عانا تيەسىلى بولدى.