ءدۇبىرلى دودادا 56 ەلدەن 4200 سپورتشى ب ا ق سىناۋدا
تۇركيانىڭ كونيا قالاسىندا يسلام ىنتىماقتاستىعى V ويىندارىنىڭ سالتاناتتى اشىلۋ ءراسىمى ءوتتى. جارىس 5 تامىزدا باستالعانىنا قاراماستان قازاقستان قۇراماسى 5 مەدال ەنشىلەپ ۇلگەردى، دەپ حابارلايدى Almaty-akshamy.kz.
سالتاناتتى ءىس-شاراعا تۇركيا پرەزيدەنتى رەدجەپ تاييپ ەردوگان، ءازىربايجان پرەزيدەنتى يلحام الييەۆ، يسلام ىنتىماقتاستىق ۇيىمىنىڭ باس حاتشىسى حۋسەين يبراگيم تاحا، سونداي-اق ءبىرقاتار ەلدەردىڭ ۇكىمەت باسشىلارى مەن مينيسترلەرى ارنايى قاتىستى.
ءدۇبىرلى دودادا 56 ەلدەن 4200 سپورتشى ب ا ق سىناۋدا. قازاقستان نامىسىن 125 سپورتشى سپورتتىڭ 16 تۇرىنەن قورعايدى.
سپورتشىلار شەرۋىندە قازاقستاننىڭ تۋىن كوتەرۋ قۇرمەتىنە سەمسەرلەسۋدەن 23 جاسقا دەيىنگى ازيا چەمپيونى – ەرلىك سەرتاي يە بولدى.
«V يسلام ىنتىماقتاستىق ويىندارىنىڭ اشىلۋ سالتاناتىندا تۋدى ۇستاپ شىعۋدى ماعان سەنىپ تاپسىرعانى ءۇشىن ەلىمىزدىڭ سپورت قوعامىنا العىسىمدى بىلدىرەمىن. بۇل مەن ءۇشىن ۇلكەن جاۋاپكەرشىلىك جانە مارتەبە. الداعى جارىستاردا جوعارى ناتيجە كورسەتىپ، ەل سەنىمىن اقتايمىز دەگەن ۇمىتتەمىن»،-دەيدى ەرلىك سەرتاي.
بايراقتى باسەكەگە قازاقستان قۇراماسىن باستاپ بارعان سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ايگۇل بەكتەنوۆا سپورتشىلار بابىندا ەكەنىن جەتكىزدى.
«سالتاناتتى اشىلۋ ءراسىمى بۇگىن ءوتىپ جاتقانىمەن سپورت تۇرلەرىنەن جارىستار 5 تامىز باستاۋ العان بولاتىن. قازىرگى تاڭدا ەل قۇراماسى 5 التىن، 1 كۇمىس، 5 قولا جۇلدەمەن جالپى كوماندالىق ەسەپتە ءۇشىنشى ورىنعا جايعاستى. بۇل وتە جوعارى كورسەتكىش. سپورتشىلارىمىز جاقسى دايىندىقپەن كەلدى. جارىس جوعارى دەڭگەيدە ۇيىمداستىرىلعان»،-دەدى ايگۇل باقىتجان قىزى.
ەستەرىڭىزگە سالا كەتەيىك، وسىعان دەيىن وتاندىق سپورتشىلار ەكى يسلام ىنتىماقتاستىق ويىندارىنا قاتىسىپ، 2017 جىلعى ءىV يسلام ىنتىماقتاستىق ويىندارىنا قازاقستان قۇراماسى قاتارىندا 7 سپورت تۇرىنەن 35 سپورتشى ونەر كورسەتىپ، ناتيجەسىندە 2 التىن، 5 كۇمىس، 12 قولا جۇلدەمەن جالپىكوماندالىق ەسەپتە 14 ورىنعا ورنىققان بولاتىن.
V يسلام ىنتىماقتاستىق ويىندارى 2021 جىلى ءوتۋى كەرەك ەدى، ءبىراق پاندەمياعا بايلانىستى 1 جىلعا كەيىنگە قالدىرىلدى.