ماۋسىمنىڭ ايىندا تەڭگە باعامى 13،3 پايىزعا السىرەدى.
ۇلتتىق بانك ءتوراعاسىنىڭ ورىنباسارى ءاليا مولدابەكوۆا تەڭگە باعامىنا اسەر ەتەتىن نەگىزگى فاكتورلار مەن ۆاليۋتا نارىعىنداعى جاعداي تۋرالى ايتتى، دەپ حابارلايدى قازاقپاراتقا سىلتەمە جاساپ.
ۇلتتىق بانك وكىلىنىڭ سوزىنشە، ماۋسىمنىڭ قورىتىندىسى بويىنشا تەڭگە باعامى ءبىر دوللار ءۇشىن 470،24 تەڭگەگە دەيىن نەمەسە 13،3 پايىزعا السىرەدى. نارىقتاعى مۇنداي وزگەرىستەرگە سىرتقى فاكتورلارمەن قاتار ىشكى فاكتورلار دا سەبەپشى بولدى.
«ءبىرىنشى كەزەكتە، اقش دوللارى پوزيسياسىنىڭ كۇشەيگەنىن اتاپ وتكەن ءجون. ىشكى فاكتورلار اراسىندا – ديۆيدەندتەر تولەۋ كەزەڭىندە زاڭدى تۇلعالار تاراپىنان ۆاليۋتاعا سۇرانىستىڭ ارتۋى جانە ەكسپورتتاۋشىلاردىڭ سالىقتى تولەۋگە ساتۋدىڭ قىسقارۋىنا بايلانىستى ۆاليۋتا ۇسىنىسىنىڭ تومەندەۋى. كۆازيمەملەكەتتىك سەكتور كومپانيالارىنىڭ شامامەن 480،4 ميلليون اقش دوللارىن قۇراعان ۆاليۋتالىق ءتۇسىمىن ساتۋى جانە ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتانى ساتۋ ۇسىنىس جاعىنان ۆاليۋتا نارىعىنا قولداۋ كورسەتتى»، - دەدى ءاليا مولدابەكوۆا.
سونىمەن قاتار، ول ماۋسىم ايىندا ۇلتتىق بانك ىشكى ۆاليۋتا نارىعىندا ۆاليۋتالىق ينتەرۆەنسيالار جۇرگىزبەگەنىن جەتكىزدى. نارىق سەنتيمەنتى مەن قۇبىلمالى بولۋى نارىق جاعدايىنا سايكەس كەلگەن.
«ايىرباستاۋ باعامىنىڭ وزگەرمەلى رەجيمىندە تەڭگە ءۇشىن قۇبىلمالىلىقتىڭ بولۋى قالىپتى جاعداي ەكەنىن اتاپ وتكىم كەلەدى»، - دەدى ۇلتتىق بانك ءتوراعاسىنىڭ ورىنباسارى ءاليا مولدابەكوۆا.
مامانىڭ ايتۋىنشا، تىركەلگەن باعام ساياساتى قىسقا مەرزىمدى تۇراقتىلىق ەلەسىن قالىپتاستىرادى. ونى ۇزاق ۋاقىت بويى جاساندى جولمەن ۇستاپ تۇرۋ التىنۆاليۋتا رەزەرۆتەرىن جۇمساۋ ەسەبىنەن عانا مۇمكىن.
«ناتيجەسىندە بۇل ۇلتتىق ۆاليۋتا باعامىن ديەۆالۆاسيالاۋ قاجەتتىلىگىنە الىپ كەلەدى. ءوز كەزەگىندە، تەڭگەنىڭ ەركىن وزگەرمەلى باعامى سىرتقى ورتانىڭ وزگەرىستەرىنە بىردەن دەن قويۋعا مۇمكىندىك بەرەدى. بۇل ەكونوميكاداعى تەڭگەرىمسىزدىكتەردىڭ جيناقتالۋىن بولدىرمايدى، سونداي-اق ەلدىڭ التىنۆاليۋتا رەزەرۆتەرىنىڭ ساقتالۋىنا ىقپال ەتەدى. سوندىقتان ۇلتتىق بانك تىركەلگەن باعامعا كوشۋ ماسەلەسىن قاراستىرمايدى»،- دەدى ول.