بىلتىر قازاقستاندا زاڭسىز ۇتىس ويىندارىن ۇيىمداستىرعان 121 ادام اكىمشىلىك جاۋاپكەرشىلىككە تارتىلىپ، ايىپپۇل تولەگەن. ولاردىڭ اراسىندا الەۋمەتتىك جەلىدە لوتەرەيا ويناتقان تانىمال بلوگەرلەر دە بار، دەپ حابارلايدى اqshamnews.kz ءتىلشىسى.
تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى الەۋمەتتىك جەلىلەر مەن ونلاين-پلاتفورمالاردى تۇراقتى تۇردە باقىلاپ وتىراتىنىن مالىمدەدى. ۆەدومستۆونىڭ حابارلاۋىنشا، مونيتورينگ ناتيجەلەرى جانە ازاماتتاردان تۇسكەن وتىنىشتەر نەگىزىندە 2025 جىلى 121 ادام اكىمشىلىك قۇقىقبۇزۋشىلىق تۋرالى كودەكستىڭ 445-1-بابى 6-بولىگى بويىنشا جاۋاپقا تارتىلعان.
مينيسترلىك زاڭسىز ۇتىس ويىندارىن وتكىزگەن اككاۋنتتاردىڭ ءتىزىمى رەسمي سايتتا جاريالانعانىن اتاپ ءوتتى. اتالعان تىزىمدە «سۋپەرماماسيتا» لاقاپ اتىمەن تانىمال ءاليا بايتۋعايەۆا، بلوگەر مەرەكە قالبايەۆا، تۇرسىنبەك قاباتوۆتىڭ بۇرىنعى جۇبايى ءمولدىر مۇقانوۆا، Justking31 اتىمەن بەلگىلى نۇربەك نۇرتازا جانە ونىڭ جۇبايى، بلوگەر دارحان جولشىبەكوۆ جانە وزگە دە تۇلعالار بار.
ەسكە سالا كەتەيىك، اقبتك-نىڭ 445-1-بابى 6 جانە 7-بولىكتەرىنە سايكەس، لوتەرەيا وپەراتورى بولىپ تابىلمايتىن تۇلعا لوتەرەيا وتكىزسە، جەكە تۇلعالارعا 100 اەك، ال شاعىن كاسىپكەرلىك سۋبەكتىلەرىنە (جك) 300 اەك ايىپپۇل سالىنادى. ەگەر بۇل قۇقىقبۇزۋشىلىق ءبىر جىل ىشىندە قايتالانسا، جەكە تۇلعالار 200 اەك، ال شاعىن كاسىپكەرلىك سۋبەكتىلەرى 750 اەك تولەيدى. سونىمەن بىرگە لوتەرەيادان تۇسكەن تابىس تاركىلەنەدى.