رەداكسيامىزعا كەشە «وگونەك» ساياجاي بىرلەستىگى تۇرعىندارىنان شاعىم ءتۇستى.
تۇرعىنداردىڭ ايتۋىنشا، كوكوزەك اۋىلىنا قاراستى اتالعان ساياجايداعى ءۇيدىڭ بىرىنەن پاتەر جالداعان جىگىت جۇرتتى پىشاقپەن قورقىتقان، دەپ حابارلايدى Almaty-akshamy.kz ءتىلشىسى.
تۇرعىندار ن.دەگەن ەسىمىن عانا بىلەتىن ازامات بۇعان دەيىن دە «اقشاسىن تولەمەگەنى ءۇشىن جارىقتى وشىرەمىز» دەپ كەلگەن ساياجاي بىرلەستىگىنىڭ ءتوراعاسىن، «ءۇيىمدى بوسات» دەگەن پاتەر يەسىن، «تەمەكى، اراق» ساتپايتىن اۋىل دۇكەنىنىڭ ساتۋشىسىن جانە كوشەدەگى بىرنەشە جۇرگىنشىنى سۋىق قارۋمەن (پىشاق) قورقىتقان، دۇكەننىڭ جانە كولىكتىڭ تەرەزەسىن سىندىرعان.
الدىڭعى كۇنى تۇرعىنداردىڭ ارىزى نەگىزىندە ونى ۋچاسكەلىك پوليسيا ۇستاپ اكەتكەن، ءبىراق تۇندە بوساتىپ جىبەرگەندىكتەن اۋىلعا قايتىپ كەلگەن. پوليسيا بۇل جاعدايدى پروكۋروردىڭ سانكسياسى بولماعاندىعىمەن ءتۇسىندىردى. ونىڭ بوستاندىقتا جۇرگەنىن كورگەن تۇرعىندار سىرتقا شىعۋعا قورقىپ، وقۋشىلار ساباققا بارا الماي قالعان.
كەشەلى بەرى تۇرعىنداردىڭ قايتا شاعىمدانۋىنا بايلانىستى اۋدان اكىمى جانە پوليسيا قىزمەتكەرلەرى بىرلەسىپ، تۇراتىن مەكەنجايىنان قاشىپ كەتكەن ازاماتتى بۇگىن قولعا تۇسىرگەن.
«پوليسيا قىزمەتكەرلەرى دۇكەندەردىڭ ءبىرىنىڭ تەرەزەسىن سىندىرىپ، اۋلادا تۇرعان اۆتوكولىكتى سىندىرعان 36 جاستاعى ماس ادامدى ۇستادى. قازىرگى ۋاقىتتا قاراساي اۋدانىنىڭ پوليسەيلەرى بۇزاقىلىق فاكتىسى بويىنشا سوتقا دەيىنگى تەرگەپ-تەكسەرۋ امالدارىن باستادى. تەرگەۋدىڭ تولىقتىعىن قامتاماسىز ەتۋ ءۇشىن بارلىق قاجەتتى تەرگەۋ ءىس-شارالارى جۇرگىزىلەدى» دەگەن اقپارات بەردى بۇگىن بىزدە الماتى وبلىستىق پد باسپا ءسوز قىزمەتى.
باسپا ءسوز قىزمەتى وكىلىنىڭ ايتۋىنشا، بۇزاقىنىڭ دەنساۋلىعىندا كىنارات بار سياقتى، ءبىراق ونىسىن دالەلدەيتىن قۇجاتى جوق.
بىزگە تۇرعىندار جەتكىزگەن اقپارات بويىنشا، بۇگىن ونى تۇراتىن جەرىنەن پوليسيا قىزمەتكەرلەرى الىپ كەتىپتى. ول تۇرعان ءۇيىن بالتالاپ، مۇلىكتەردى ءبۇلدىرىپ، ماتەريالدىق شىعىن دا كەلتىرگەن كورىنەدى.
بۇعان دەيىن بىرنەشە ادام ونىڭ ۇستىنەن ارىزدانعان، ءقازىر ساياجاي تۇرعىندارى اۋداندىق پوليسيا باسقارماسىنا قول جيناپ، بىرىگىپ ارىز جازىپ جولداماق نيەتتە.