بۇگىندە قازاقستان حالىقارالىق كينوفەستيۆالدەردىڭ تۇراقتى قاتىسۋشىسى.
بۇل جولى تاڭعى شىق ەلىندە ءوتىپ جاتقان 27ء-شى پۋسان حالىقارالىق كينوفەستيۆالىندە فارحات ءشارىپوۆتىڭ «سحەما» ءفيلمى ەڭ ۇزدىك ازيالىق فيلم اتاعىنا تالاسادى. تانىمال بايقاۋدا قازىلار القاسى اكتريسا جانار ايجانوۆانىڭ جۇمىسىنا جوعارى باعا بەردى، دەپ حابارلايدى Almaty-akshamy.kz Qazaqtv.com-عا سىلتەمە جاساپ.
ول ەڭ ۇزدىك ايەل رولىنە ۇمىتكەرلەردىڭ بەستىگىنە ەندى. اكتريسانىڭ ايتۋىنشا، مۇنداي بەدەلدى كينوفورۋمعا قاتىسۋدىڭ ءوزى جەڭىس.
«كينوعا كەشە عانا كەلگەنمىن، ءالى 10 جىل بولعان جوق. 6-7 جىلدىڭ ىشىندە كوزگە ىلىگىپ كەلىپ، ۇزدىكتەردىڭ قاتارىنا كىرگەن مەندە ارمان جوق. سوندىقتان دا جاستارىمىزعا ءبىزدىڭ جولىمىزدى بەرسىن، بىزدەن ءارى قاراي اسىپ كەتسىن، فەستيۆالداردان قالماسىن، جۇلدەلى ورىنعا يە بولسىن»، - دەدى ءانشى، اكتريسا جانار ايجانوۆا.
كينوفەستيۆالگە رەجيسسەر دارينا ماناپوۆا دا قاتىسۋدا. بۇل جەردە ونىڭ شەتەلدىك ارىپتەستەرىمەن بىرلەسە تۇسىرگەن ءفيلمىنىڭ كورسەتىلىمى بولادى. دارينانىڭ كارتينالارى بۇرىننان بەلگىلى بولعانىمەن، ول ءۇشىن پۋسان كينواكادەمياسىندا وقۋ - جاڭا جەتىستىكتەرگە اپاراتىن جول.
«مەن مۇندا 10 ادامنان قۇرىلعان كوماندامەن بىرگە فيلم ءتۇسىرىپ جاتىرمىن. مەنىمەن بىرگە 3 رەجيسسەر 10 كۇن بويى ءبىر قىسقامەتراجدى ءفيلمدى تۇسىرەمىز. ونىڭ الدىندا ءبىر ايلىق ءوندىرىس الدىنداعى دايىندىق بار. بۇل - شىن مانىندە، بىرەگەي باعدارلاما، ويتكەنى، مەنىڭ ويىمشا، ازيادا بالاماسى جوق. بىزبەن كۇندە سويلەسەتىن جانە بۇل سيرەك كەزدەسەتىن جوعارى ساناتتى مامانداردان، تالىمگەرلەردەن كەڭەس الۋعا ۇلكەن مۇمكىندىك بار»، - دەيدى رەجيسسەر دارينا ماناپوۆا.