قازاقستاندا الەۋمەتتىك جەلىلەر مەن ونلاين پلاتفورمالاردا جاريالاناتىن ءبىلىم بەرۋ جانە وككۋلتتىك مازمۇندى مىندەتتى تۇردە بەلگىلەۋ تۋرالى باستاما كوتەرىلىپ وتىر، دەپ حابارلايدى aqshamnews.kz
بۇل تۇزەتۋلەر مادەنيەت جانە اقپارات مينيسترلىگى ازىرلەگەن جاڭا زاڭ جوباسىنا ەنگىزىلگەن.
زاڭ جوباسى "ونلاين پلاتفورمالار جانە ونلاين جارناما تۋرالى" زاڭنىڭ 16-بابىن تولىقتىرعان. وسىعان سايكەس، كەز كەلگەن سالاعا بايلانىستى وقىتۋ كۋرستارى نەمەسە ءبىلىم بەرۋ ماتەريالدارى جاريالانسا، مۇنداي كونتەنتتە مىندەتتى تۇردە اۆتوردىڭ ءبىلىمى تۋرالى اقپارات كورسەتىلۋى ءتيىس. ول – ديپلوم نەمەسە سەرتيفيكات جونىندەگى مالىمەتتەر.
قۇجاتتا "وقىتۋ ماتەريالدارىن ورنالاستىرۋ كەزىندە اۆتوردىڭ ءبىلىمى تۋرالى مالىمەتتەر كورسەتىلۋگە ءتيىس" دەپ انىق جازىلعان.
ەگەر اتالعان تالاپ ورىندالماسا، جاريالانعان ماتەريال زاڭبۇزۋشىلىق بولىپ تانىلادى. ياعني بلوگەرلەر، كوۋچتار جانە كەز كەلگەن وقىتۋ كۋرستارىنىڭ اۆتورى ءوزىنىڭ كاسىبي بىلىكتىلىگىن اشىق كورسەتۋگە مىندەتتەلەدى.
زاڭ جوباسىندا وككۋلتتىك قىزمەتتەر نەمەسە ونىمەن ۇقساس باسقا قىزمەتتەر تۋرالى اقپاراتتى قامتيتىن كونتەنت تاراتىلسا، مۇنداي ماتەريال مىندەتتى تۇردە تەك كوڭىل كوتەرۋ ماقساتىندا جاسالعانىن جانە عىلىمي نەمەسە پراكتيكالىق راستاماسى جوق ەكەنىن كورسەتەتىن ەسكەرتۋمەن جاريالانۋى كەرەك. قۇجاتقا سايكەس "وككۋلتتىك پراكتيكالارعا قاتىستى ماتەريالدار ورنالاستىرىلعان كەزدە ولاردىڭ سيپاتى تۋرالى ەسكەرتۋ بەرىلەدى" دەلىنگەن. بۇل وسىنداي كونتەنت مىندەتتى بەلگىمەن جاريالانۋعا قاجەت دەگەندى بىلدىرەدى.