ەلىمىزدە پروفيلاكتيكالىق سكرينينگتەر مەملەكەت كەپىلدىك بەرگەن مەديسينالىق قىزمەتتەر پاكەتىنە ەنگىزىلگەن. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ايتتى.
پرەزيدەنتتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن جانە وزگە دە تاپسىرمالارىن جۇزەگە اسىرۋ شەڭبەرىندە ۇكىمەت دەنساۋلىق ساقتاۋ مينيسترلىگى تاراپىنان حالىققا مەديسينالىق قىزمەتتەردىڭ ساپاسى مەن قولجەتىمدىلىگىن ارتتىرۋ بويىنشا جۇمىستار جۇرگىزىپ جاتىر.
ءمامس جۇيەسى ەنگىزىلگەننەن بەرى دەنساۋلىق ساقتاۋ سالاسىن قارجىلاندىرۋ كولەمى ءۇش ەسەگە ارتتى. بۇل حالىقتىڭ جوعارى تەحنولوگيالىق جانە قىمبات قىزمەتتەرگە قولجەتىمدىلىگىن كەڭەيتۋگە مۇمكىندىك بەردى. ەندى بارلىق مەديسينالىق كومەك ناقتى ەكى بولىككە بولىنەدى: ەل تۇرعىندارىنىڭ بارلىعىنا مەملەكەت تولىق كەپىلدىك بەرەتىن بازالىق پاكەت جانە ساقتاندىرىلعان ازاماتتارعا ارنالعان كەڭەيتىلگەن ساقتاندىرۋ پاكەتى.
«ەڭ كوپ تارالعان الەۋمەتتىك ماڭىزى بار اۋرۋلار بويىنشا سكرينينگتەر ساقتاندىرۋ مارتەبەسىنە قاراماستان بارلىق ازاماتتار ءۇشىن قولجەتىمدى. بيىلدان باستاپ 50 جاستان اسقان ەر ادامدار ءۇشىن قاتەرلى ىسىكتەردى، جۇرەك-قان تامىرلارى اۋرۋلارىن جانە مي قان اينالىمىنىڭ ءجىتى بۇزىلىستارىن ەرتە انىقتاۋ ءۇشىن سكرينينگتىڭ جاڭا تۇرلەرى ەنگىزىلەدى. الەۋمەتتىك ماڭىزى بار اۋرۋلارعا شالدىقتى دەگەن كۇدىك تۋىنداعان جاعدايدا تەكسەرۋلەر وسى زاڭ اياسىندا بارلىعىنا دا قولجەتىمدى بولادى»، — دەپ اتاپ ءوتتى اقمارال ءالنازاروۆا.
وسىلايشا، رەفورما قىزمەتتەردەگى تۇسىنبەۋشىلىكتى جويىپ قانا قويماي، بۇكىل حالىق ءۇشىن اۋرۋلاردى ەرتە انىقتاۋ مەن الدىن الۋعا باسىمدىق بەرىلەدى.