پرەزيدەنتتىڭ ساياسي لاۋازىمدا وتىرعان تۋىستارى قىزمەتىنەن كەتەدى

كونستيتۋسياعا پرەزيدەنتتىڭ جاقىن تۋىستارىنا ساياسي لاۋازىمدارعا ورنالاسۋىنا تىيىم ەنگىزىلەدى.

ق ر ادىلەت ءمينيسترى قانات ءمۋسيننىڭ ايتۋىنشا، زاڭ كۇشىنە ەنگەننەن كەيىن، پرەزيدەنتتىڭ تۋىستارى لاۋازىمدارىن بوساتادى، دەپ حابارلايدى Almaty-akshamy.kz.

«مينيسترلەر مەن ولاردىڭ ورىنباسارلارى جايىندا ايتقانىمدا، كەيبىر لاۋازىمداردى عانا اتاپ وتكەن ەدىم. جالپى، كونستيتۋسياعا پرەزيدەنتتىڭ جاقىن تۋىستارىنا ساياسي لاۋازىمدارعا ورنالاسۋىنا تىيىم ەنگىزىلەدى. ساياسي لاۋازىمداردىڭ ءتىزىمى بارىنشا كەڭ. وعان بەلگىلى ءبىر دارەجەدەگى ديپلوماتيالىق قىزمەتكەرلەر دە كىرەدى. ولاردى تولىق ءتىزىپ شىققان جوقپىن. ساياسي لاۋازىمداردىڭ ءتىزىمى اشىق، قولجەتىمدى. سوندىقتان كەز كەلگەن ادام قاراپ، قورىتىندى شىعارا الادى»، - دەدى مينيستر.

وسى رەتتە قانات مۋسين ب ا ق وكىلدەرىنىڭ پرەزيدەنتتىڭ جاقىن ءبىر تۋىسىنىڭ شەت مەملەكەتتە ەلشى قىزمەتىن اتقارىپ جۇرگەنىنە قاتىستى ساۋالىنا جاۋاپ بەردى.

«مۇنداي تىيىم ەنگىزىلگەننەن كەيىن، بارلىعى زاڭناماعا سايكەس كەلتىرىلەدى. ول بۇل لاۋازىمدى بوساتادى. ويتكەنى، زاڭعا سايكەس، ول بۇل قىزمەتتى اتقارا المايدى»، - دەدى ول.