پرەزيدەنتتىك ستيپەنديا نەشىنشى كۋرستان باستاپ تاعايىندالادى؟

2023 جىلى پرەزيدەنتتىك ستيپەنديا ەلىمىزدىڭ 55 جوعارى وقۋ ورنىندا 1005 ستۋدەنت پەن 7 ماگيسترانتقا تاعايىندالدى.

پرەزيدەنتتىك ستيپەنديانى تاعايىنداۋ تۋرالى قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەكتىڭ بۇيرىعى شىقتى، دەپ حابارلايدى Almaty-akshamy.kz.

عىلىم جانە جوعارى ءبىلىم مينيسترلىگىنىڭ مالىمەتىنشە، باكالاۆر ستۋدەنتتەرى ءۇشىن پرەزيدەنتتىك ستيپەنديا مولشەرى – 73 320 تەڭگە، ماگيسترانتتار ءۇشىن – 173 974 تەڭگە.

ق ر پرەزيدەنتى ستيپەندياسىنىڭ ماقساتى – ءبىلىم الۋشىلاردىڭ عىلىمي-زەرتتەۋ جانە وقۋ-تانىمدىق قىزمەتىن ىنتالاندىرۋ، نەعۇرلىم دارىندى جانە قابىلەتتى ستۋدەنتتەر مەن ماگيسترانتتاردى قولداۋ، سونداي-اق زياتكەرلىك الەۋەتتى قالىپتاستىرۋعا جاردەمدەسۋ.

ستيپەندياتتار ءۇشىن ىرىكتەۋدىڭ نەگىزگى كريتەرييى - تەك «وتە جاقسى» (ا، ا -) وقۋ. سونداي-اق، ستۋدەنتتەر مەن ماگيسترانتتاردىڭ رەسپۋبليكالىق جانە حالىقارالىق وليمپيادالارداعى، شىعارماشىلىق كونكۋرستارداعى، سپورتتىق جارىستارداعى، فەستيۆالدارداعى جەتىستىكتەرى ەسكەرىلەدى.

سونىمەن قاتار، اشىلۋلار مەن ونەرتابىستاردىڭ اۆتورلارى ستيپەنديا يەگەرلەرى بولا الادى؛ عىلىمي ەڭبەكتەر جيناعىندا، رەسپۋبليكالىق جانە حالىقارالىق عىلىمي جۋرنالداردا جاريالانىمدارى بار ءبىلىم الۋشىلار؛ جەتىستىكتەرى ديپلومدارمەن، گراموتالارمەن، سەرتيفيكاتتارمەن، كۋالىكتەرمەن راستالعان عىلىمي-زەرتتەۋ جۇمىستارىمەن بەلسەندى اينالىسادى؛ ءبىلىم بەرۋ ۇيىمدارىنىڭ قوعامدىق، مادەني جانە سپورتتىق ومىرىنە قاتىسادى.

پرەزيدەنتتىك ستيپەنديا 3 كۋرستان باستاپ كۇندىزگى بولىمدە وقيتىن ستۋدەنتتەرگە جانە ەكىنشى كۋرستان باستاپ ماگيسترانتتارعا تاعايىندالادى.