ليونەل مەسسي كەزەكتى رەت الەمنىڭ ەڭ ۇزدىك فۋتبولشىسى اتاندى.
سالتاناتتى شارا فرانسيانىڭ پاريج قالاسىندا ءوتتى. كوپشىلىكتىڭ داۋىس بەرۋ ناتيجەسىندە 36 جاستاعى ارگەنتينالىق سپورتشى اتالمىش جۇلدەگە قول جەتكىزدى، دەپ حابارلايدى Almaty-akshamy.kz 24.kz-كە سىلتەمە جاساپ.
مەسسيدەن بولەك، ۇزدىك ۇشتىككە «مانچەستەر سيتي» كومانداسىنىڭ ويىنشىسى ەرلينگ حوللاند پەن پسج كومانداسىنىڭ شابۋىلشىسى كيلليان مباپپە كىردى. سونداي-اق مادريدتىك «رەال» فۋتبولشىسى دجۋد بەللينگەم 21 جاسقا دەيىنگى ۇزدىك ويىنشىعا تابىستالاتىن «كوپا» جۇلدەسىنە يە بولدى. ال جىلدىڭ ەڭ ۇزدىك قاقپاشىسى اتاعىن ارگەنتينا قۇراماسى ساپىنداعى ەميليانو مارتينەس الدى. ەرلينگ حوللاند بولسا ۇزدىك شابۋىلشىعا بەرىلەتىن «گەرد ميۋللەر» جۇلدەسىن يەلەندى. ايەلدەر اراسىندا «بارسەلونا» ويىنشىسى ايتانا بونمانتي «التىن دوپ» يەگەرى بولدى. وعان قوسا «بارسەلونا» ايەلدەر كومانداسى اراسىندا جىلدىڭ ۇزدىك كلۋبى اتاندى. ەرلەر اراسىندا اتالمىش ماراپاتقا «مانچەستەر سيتي» يە بولدى.
«8 بىردەي «التىن دوبىم» بار جانە مەن ءۇشىن ءارقايسىسىنىڭ ورنى ەرەكشە. بيىل كوماندامىزدىڭ جەتىستىكتەرى ەسكەرىلدى. ياعني، الدىمەن امەريكا كۋبوگىندا، ارتىنشا الەم چەمپيوناتىندا توپ جاردىق. سوندىقتان بۇل – كوماندانىڭ جۇلدەسى. ونسىز قول جەتكىزە الماس ەدىم. ۇلتتىق قۇراماداعى جىگىتتەرمەن بىرگە بارلىق قيىندىقتى ەڭسەردىك. ەندى جەمىسىن كورىپ جاتىرمىز»، - دەيدى «التىن دوپ» سىيلىعىنىڭ يەگەرى ليونەل مەسسي.