پرەزيدەنتتىك جاستار كادرلىق رەزەرۆىنىڭ ەكى مۇشەسى لاۋازىمدى قىزمەتكە باردى. بۇل تۋرالى پرەزيدەنتتىڭ كومەكشىسى ەرلان قارين تەلەگرام-كانالىندا جازدى، دەپ حابارلايدى almaty-akshamy.kz
«پرەزيدەنتتىك جاستار كادرلىق رەزەرۆىنىڭ جەلىسى بويىنشا تاعى ەكى مامان قىزمەتكە تاعايىندالدى. تيمۋر مەڭدىبايەۆ «سامۇرىق-قازىنا» ۇلتتىق ءال-اۋقات قورىنىڭ ستراتەگيالىق جوسپارلاۋ جانە نارىقتاردى تالداۋ دەپارتامەنتىنىڭ ديرەكتورى، ال باقتيار مۇحامەتقالييەۆ «ازاماتتارعا ارنالعان ۇكىمەت» كوممەرسيالىق ەمەس اكسيونەرلىك قوعامىنىڭ باسقارما اپپاراتىنىڭ سەرۆيس جونىندەگى باسقارۋشى ديرەكتورى بولدى»، -دەپ جازدى ەرلان قارين.
ونىڭ ايتۋىنشا، پرەزيدەنتتىك جاستار كادرلىق رەزەرۆى قۇرىلعاننان بەرى وعان مۇشە 184 جاس مامان جاۋاپتى ورىندارعا قىزمەتكە تۇرعان.
«وسىلايشا، بۇگىنگى تاڭدا رەزەرۆتەگى 184 جاس مامان جۇمىسقا ورنالاستى. قىركۇيەك ايىندا پرەزيدەنتتىك جاستار كادرلىق رەزەرۆىنىڭ ەكىنشى جيىنىنا كونكۋرس باستالادى»، - دەدى مەملەكەت باسشىسىنىڭ كومەكشىسى.