ەلوردادا قازاقتىڭ ۇلى اقىنى اباي قۇنانباي ۇلىنىڭ تۋعان كۇنىنە وراي «اباي مەرەيتويى» اتتى كىتاپتىڭ تۇساۋكەسەر ءراسىمى ءوتتى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ايتۋلى اقىننىڭ تۋعان كۇنىنە وراي ۇيىمداستىرىلعان «ادامزاتتىڭ ءبارىن ءسۇي، باۋىرىم دەپ» اتتى ونلاين ءدارىس- كونسەرتىنىڭ اياسىندا «اباي مەرەيتويى» اتتى كىتاپتىڭ تۇساۋى كەسىلدى.
«وسىنداي ايتۋلى داتا الەمدى جايلاعان ىندەتتىڭ سالدارىنان ونلاين تۇردە ءوتىپ جاتىر، وكىنىشتى. دەگەنمەن رۋحىمىز مىقتى. اباي سەكىلدى ۇلى اقىننىڭ تۋعان كۇنى قازاقستان عانا ەمەس، الەمدىك دەڭگەيدە اتالىپ وتىلۋدە. ونىڭ دالەلى بۇگىنگى شارانى تەك قازاقستاندىقتار عانا ەمەس، الەمنىڭ تۇكپىر-تۇكپىرىندەگى قانداستارىمىز تاماشالاپ وتىر. وتكەن جىلى مەملەكەت باسشىنىڭ جارلىعىمەن اباي كۇنى كەڭ اۋقىمدا اتالىپ ءوتتى. مەرەيتوي ونىمەن بىتكەن جوق، بيىل دا جالعاسىن تابۋدا. ءبىز دە ءوز تاراپىمىزدان ءبىر كىسىدەي اتسالىسىپ جاتقان جايىمىز بار»، - دەدى «وتانداستار» اق-نىڭ ۆيسە-پرەزيدەنتى ماعاۋيا سارباسوۆ ايتۋلى شارادا.
اۆتورلاردىڭ مالىمدەۋىنشە، كىتاپقا ABAI TV تەلەارناسىنىڭ اشىلۋى، عىلىمي كونفەرەنسيالار مەن سيمپوزيۋمدار، مەرەيتويلىق مونەتالار مەن ماركالار، شەتەلدەردەگى اباي ەسكەرتكىشتەرى، ساياباقتار، كوشەلەر مەن مادەني-اقپاراتتىق ورتالىقتاردىڭ اشىلۋى سياقتى مەرەيتوي جىلىندا اتقارىلعان ماڭىزدى وقيعالار ەنگەن.
سونداي-اق، اتالعان شارادا اباي شىعارمالارىنىڭ جاپون، كورەي، تۇرىك، اعىلشىن، قىرعىز، پورتۋگال، اراب، يتاليان، جۇڭگو جانە الەمنىڭ باسقا دا كوپتەگەن تىلدەرىنە اۋدارىلىپ شىعاتىنى ايتىلدى.