اقمولا وبلىسىندا “براكونەر” وپەراسياسى قورىتىندىلاندى، دەپ حابارلايدى almaty-akshamy.kz Polisia.kz سىلتەمە جاساپ.
تابيعاتتى قورعاۋ زاڭناماسى سالاسىنداعى اكىمشىلىك قۇقىق بۇزۋشىلىقتار مەن قىلمىستاردىڭ الدىن الۋ جانە انىقتاۋ، براكونەرلىك فاكتىلەرىنىڭ جولىن كەسۋ ماقساتىندا 3-9 تامىز ارالىعىندا اقمولا وبلىسىنىڭ اۋماعىندا “براكونەر” جەدەل الدىن الۋ ءىس-شاراسى وتكىزىلدى. زەرەندى اۋدانىنداعى مىرزاكولسور كولىندە وتكەن رەيدتىك ءىس-شارا بارىسىندا پوليسەيلەر كوكشەتاۋ قالاسى مەن سولتۇستىك قازاقستان وبلىسىنىڭ تايىنشا قالاسىنىڭ تۇرعىندارىن ۇستادى.
براكونەرلەردەن 80 كيلوگرامم تۇقى بالىعى جانە سينتەتيكالىق مونوفيلامەنتتەن جاسالعان جالپى ۇزىندىعى 420 مەتر بولاتىن التى تور تاركىلەندى. ەستەرىڭىزگە سالا كەتەيىك، قازاقستان رەسپۋبليكاسى اۋماعىندا قولدانىستاعى بالىق اۋلاۋ ەرەجەلەرىنە سايكەس “جۇڭگو” جەلىلەرىن، ياعني سينتەتيكالىق مونوفيلامەنت جەلىلەرىن پايدالانا وتىرىپ، بالىق اۋلاۋعا جول بەرىلمەيدى.
قازىرگى ۋاقىتتا اتالعان فاكتى بويىنشا ق ر اقبتك 383-بابىنىڭ 3-بولىگى (بالىق اۋلاۋ جانە بالىق رەسۋرستارى مەن باسقا دا سۋ جانۋارلارىن قورعاۋ ەرەجەلەرىن بۇزۋ) بويىنشا اكىمشىلىك حاتتاما تولتىرىلدى. جالپى، “براكونەر” وپەراسياسىنىڭ جەتى كۇنىندە 228 اكىمشىلىك قۇقىق بۇزۋشىلىق جانە ءبىر قىلمىستىق تەرىس قىلىق انىقتالدى. ونىڭ ىشىندە ق ر اقبتك 382-بابى بويىنشا زاڭسىز اڭ اۋلاۋ ەرەجەلەرىن بۇزعانى ءۇشىن 144 قۇقىق بۇزۋشى اكىمشىلىك جاۋاپكەرشىلىككە تارتىلدى. سونىمەن قاتار ق ر اقبتك 383-بابى بويىنشا سۋ جانۋارلارىن زاڭسىز اۋلاعانى جانە بالىق اۋلاۋ ەرەجەلەرىن بۇزعانى ءۇشىن 76 اكىمشىلىك ماتەريال جاسالدى.
ق ر اقبتك- 381-1-بابى (اعاشتار مەن بۇتالاردى زاڭسىز كەسۋ، جويۋ نەمەسە ءبۇلدىرۋ) بويىنشا سەگىز قۇقىق بۇزۋشىلىق انىقتالدى، سونداي-اق ەرەكشە قورعالاتىن تابيعي اۋماقتا زاڭسىز اڭ اۋلاعانى ءۇشىن قك 337-بابى بويىنشا قىلمىستىق ءىس قوزعالدى.